Partia Demokratike ka njoftuar sot e do të mbledhë me datë 23 dhjetor Këshillin Kombëtar në orën 17:30, në sallën e mbledhjeve, në katin e dytë të selisë blu.
Mbledhja e radhës, vjen pas mbajtjes së Kuvendit Kombëtar më 18 dhjetor.
Në rendin e ditës do të jenë dy çështje kryesore që do diskutohen dhe që lidhen me përjashtimin nga funksionet drejtuese në parti të çdo individi që është shpallur person “non grata” nga SHBA-të.
Miratimi i këtij propozimi e nxjerr Sali Berishën jashtë dy organeve më të larta drejtuese, Kuvendi dhe Këshilli Kombëtar dhe e vetmja pikë që e mban të lidhur ish-liderin e së djathtës me PD-në e Lulzim Bashës është karta e anëtarësisë të cilën e mban që nga dita kur themeloi partinë.
Vendimi i dytë shumë me rëndësi, është shpallja nul e Kuvendit të datës 11 dhjetor, i thirrur nga Berisha. Ky Kuvend, për Bashën, ka qenë a priori nul. Por, një vendim përfundimtar statutor dhe i kaluar në Këshill, do t’i jepte goditjen përfundimtare, atij që kryedemokrati dhe të tjerë, e kanë përshkruar si “tubim”.
Kuvendi i 11 dhjetorit – dhe një kuvend rival një javë më vonë – shënoi kulmin e një lufte të shëmtuar tre mujore mbi lidershipin e Partisë Demokratike të opozitës.
Në një anë qëndron Berisha, pjesë e politikës shqiptare që nga rënia e komunizmit tre dekada më parë dhe në anën tjetër është Basha, njeriu që Berisha promovoi nëpër radhët e partisë dhe të cilit përfundimisht i dorëzoi frenat e saj në vitin 2013.
Kuvendi shkarkoi me votim të fshehtë kryetarin e PD-së, Lulzim Basha me propozimin e 7 deputetëve dhe 15 për qind të delegatëve. Ai u shkarkua për thyerje të rënda të statutit dhe dëmtim të interesave politike dhe elektorale të saj. Por, jo vetëm. Kuvendi Kombëtar i 11 dhjetorit, i mbledhur nga njëra palë ka shkarkuar gjithë kupolën drejtuese të partisë dhe ka zhveshur nga funksionet edhe Kryesinë e saj me argumentin se nuk janë zgjedhur në konform statutit.
Me ndryshimet në statut, servirur vetëm të shtunën delegatëve, Kuvendi ka shfuqizuar edhe vendimin e Lulzim Bashës për të pezulluar nga grupi parlamentar i PD-së, Sali Berishën.
Situata pas mbajtjeve të dy kuvendeve është bërë akoma edhe më kaotike, ku i paraprihet një procesi paralel brenda PD-së, një përfaqësohet nga strukturat zyrtare dhe tjetra nga një komision i përkohshëm rithemelimi që do të pushojë së ekzistuari me 22 mars 2022, atëherë kur është thirrur një Kuvend i ri nga njëra palë./tch
