Gashi: Institucionet kanë dështuar në ofrimin e sigurisë për rastet e dhunës

Leotrim Gashi nga IKD-ja ka thënë se në çdo raportim që bëhet varësisht në çfarë faze të procedurës është, do t’i marrin hapat e duhur.

Ai ka thënë se nëse ka nevojë për përfaqësim në gjykatë, ata do të caktojnë mbrojtësin që ta përfaqësojë viktimën e dhunës në gjykatë.

Sipas tij, arsyeja pse kanë ndodhur lëshimet nga ana e institucioneve është edhe mungesa e mbrojtjes efektive ndaj grave që kanë raportuar dhe si pasojë e mosreagimit institucional ato janë vrarë.

“Ne do t’u sigurojmë secilës prej tyre mbrojtje efektive. Ne do ta mbikëqyrim që çdo institucion të veprojë në kohën e duhur. Nëse kjo nuk ndodhë atëherë ne do t’i shtjerrim të gjithë mekanizmat. Nëse bisedojmë më institucione ato thonë se po e bëjnë të pamundurën por kur shohim në terren gjendja është ndryshe. Një grua mund të dërgohet në strehimore por qëndrimi atje nuk mund të jetë më i gjatë se 6 muaj. Shoqëria civile e ka të pamundur që të bëjë edhe shtëpi se ku duhet të vendosen ato prandaj për këtë duhet të luftojë shteti”, ka thënë ai.

Gashi ka thënë se dëshirojnë që secila viktimë e dhunës në familje duhet të ndihen të sigurt në adresimin që i bëhet kësaj qendre.

Sipas tij, kjo platformë do të ndikojë edhe në rritjen e raportimit.

Nga sot, gratë që përjetojnë dhunë në familje, kanë një mundësi më tepër për ta raportuar atë.

Sot është lansuar platforma online në kuadër të Qendrës për Ndihmë Juridike Falas, e që është financim i Bashkim Evropian.

Lansimi i projektit është bërë në kuadër të 16 ditëve të aktivizmit kundër dhunës në familje.

Leutrim Gashi nga IKD-ja, në një intervistë në interaktiv të KTV-së, e ka quajtur ndihmesë të madhe këtë platformë.

“Gjithë gratë dhe qytetarët që kanë probleme dhe dhunë në familje mund të qasen në platformë.

Në momentin që shkruajnë apo thërrasin, juristët e qendrës do të jenë të gatshëm të ndihmojnë. Agjencia për ndihmë juridike falas ka disa degë nëpër komuna, por qasja nuk është gjithmonë e lehtë, prandaj qasja online është me e lehtë. Kjo platformë mund të thirret pa pagesë, mund të kontaktohet edhe përmes rrjeteve sociale. Ka mënyra të ndryshme”, ka thënë Gashi.

© KOHA. Të gjitha të drejtat janë të rezervuara.