Rama në balotazh ka pasur rritjen më të madhe të votave krahasuar me raundin e parë
Fituesi i zgjedhjeve për kryetar të Prishtinës, Përparim Rama, ka pasur rritjen më të madhe të numrit të votave në balotazh të dielën, krahasuar me raundin e parë më 17 tetor.
Më 17 tetor Rama kishte 25.252 vota, ndërsa të dielën ka marrë 40.659 duke e mposhtur Arben Vitinë e Vetëvendosjes në balotazh.
Një rritje për 8098 vota ka pasur Shaqir Totaj i PDK-së që ka fituar zgjedhjet në Prizren. Ndërsa Shpejtim Bulliqi i Vetëvendosjes që i ka fituar zgjedhjet në Podujevë ka pasur rritje prej 3375 votave.
“Bazuar në rezultatet e publikuara dje nga Komisioni Qendror i Zgjedhjeve, në të gjitha komunat ka pasur lëvizje të shumta në vota të kandidatëve, që variojnë nga mbi +15,000 e deri në -250 sosh. Tre kandidatët me rritjen më të madhe në vota janë Përparim Rama (+15,407), Shaqir Totaj (+8,098) dhe Shpejtim Bulliqi (+3,375)”, ka shkruar Eugen Cakolli i KDI-së në Facebook.
