Arbëri

Telekomi i Zvicrës hap vende pune në Kosovë

Kompania zvicerane e telekomunikimit Swisscom pritet të hapë nga pranvera e vitit të ardhshëm 45 vende pune në Kosovë.

Nëse klientët e Swisscomit, siç quhet telekomi zviceran, në të ardhmen kanë ndonjë problem, ata do të lidhen me një qendër të thirrjeve (Callcenter) në Kosovë. Kështu njoftojnë mediat zvicerane. Ndërmarrja e madhe zvicerane e telekomunikacionit, e cila pjesërisht është në pronësi të shtetit, do të hapë 45 vende të punës në Kosovë. Kjo pritet të bëhet realitet në pranverën e vitit të ardhshëm.

Një zëdhënës i Swisscomit ka konfirmuar se nga pranvera e vitit 2022 do të startojë një projekt testues në Kosovë. Deri më tani këtë punë e kryente një firmë partnere e Swisscomit në Zvicër, në të ardhmen këtë do ta bëjë një ndërmarrje në Kosovë. Përkundër zhvendosjes së vendeve të punës, cilësia e shërbimeve të Swisscomit do të ruhet edhe në Kosovë, ka garantuar Swisscom. Të gjithë 45 punëtorët kosovarë që do të punojnë për Swisscomin flasin gjermanisht. Pas fazës testuese që do të zgjasë deri në fund të vitit 2022, do të vendoset nëse projekti do të jetë i përhershëm në Kosovë.

Krahas sindikatave edhe deputetët në parlamentin e Zvicrës në Bern nuk e kanë pritur me entuziazëm hapjen e 45 vendeve të punës në Kosovë. “Një ndërmarrje që pjesërisht është në pronësi të shtetit ka njëfarë obligimi ndaj Zvicrës”, tha deputeti Martin Candinas nga partia Mitte (Qendra). “Nëse Swisscomi gjen punëtorë të përshtatshëm në Kosovë, atëherë do të gjente edhe në trevat zvicerane si Surselva, Oberwallis apo Toggenburg”. Deputeti tjetër Michael Töngi nga partia e gjelbër tha se më 25 tetor komisioni për telekomunikacion do të diskutojë mbi synimet strategjike të Swisscomit dhe do të pyes përgjegjësit e kësaj ndërmarrjeje se ç’mendojnë mbi zhvendosjen e vendeve të punës.