1 perditesime
23:12

Ratkoceri thotë se u mirëprit paralajmërimi që në vitin 2023 të hiqen kufijtë

Gazetari i Maqedonisë së Veriut, Arben Ratkoceri, ka thënë se paralajmërimi për heqje të kufijve në Ballkan në vitin 2023, që u bë në samitin e Shkupit që është mbajtur të enjten, është mirëpritur dhe është diskutuar me të madhe.

“Më surprizues ishte paralajmërimi qe pas dy vitesh, në vitin 2023 të hiqeshin kufijtë. Kjo u mirëprit nga opinioni ndërkaq ishte befasuese marrëveshja që ka të bëjë me të drejtën e punës të një qytetari për shembull, nga Maqedonia në Serbi apo Shqipëri pa atë rrugën burokratike që duhet ndjekur zakonisht. Me dijeninë time është njëfarë organizate AEO quhet e cila e ka të rregulluar këtë çështje, jo vetëm në rajon por në të gjithë Evropën, një transportues kontrollohet në pikënisjen e tij dhe në destinacionin e fundit, pa pasur nevojë që të pritet aq shumë në kufij”, ka thënë Ratkoceri.

Sipas tij, çfarëdo marrëveshje pa Kosovën jo që do të jetë e cunguar por nuk do të ketë as efektin e pritur.

“Edhe marrëveshja pa Kosovën jo që do të jetë e cunguar por nuk besoj që do të ketë efektin e pritur nga iniciuesit e kësaj iniciative. Për Maqedoninë si tërësi më e rëndësishmja është që Kosova të jetë pjesë e kësaj marrëveshje sesa shtetet e tjera. Krejt çështja thirret rreth pjesëmarrjes apo mospjesëmarrjes së Kosovës”, është shprehur Ratkoceri.

 

23:05

Ratkoceri: Marrëveshjet në Shkup për “Open Ballkan” janë gjysmake

Gazetari nga Maqedonia e Veriut, Arben Ratkoceri, ka thënë se samiti i mbajtur sot në Shkup mes kryeministrit të Shqipërisë, Edi Rama, kryeministrit maqedonas Zoran Zaev dhe presidentit të Serbisë, Aleksander Vuçiq, që përfundoi me marrëveshjen e ‘’Open Balkan’’, ka shumë paqartësi.

Ai thotë se kjo marrëveshje është shumë gjysmake, për shkak se tri shtete të rajonit nuk janë pjesë e saj.

‘’Nga pikëpamja mediale është përcjell ky samit i mbajtur në Shkup. Këto dokumente të nënshkruara edhe teknikisht janë gjysmake, përderisa mungojnë edhe tri shtete të rajonit. Ka paqartësi shumë. Edhe iniciuesit nuk kanë arritur ta sqarojnë këtë, si do të jetë fundi i kësaj. Ka një far lloj skepticizmi. Iniciativa të ngjashme ka pasur më herët, por asokohe kur u takuan presidentët e Kosovës, Shqipërisë, Maqedonisë dhe Malit të Zi, takimin e bojkotoi Serbia’’, ka thënë Ratkoceri në ‘’Interaktiv’’ të KTV-së.

Tutje, ai deklaroi që asnjë nga partitë shqiptare nuk kanë reaguar rreth kësaj marrëveshje.

‘’Asnjë reagim nuk ka. BDI-ja që është parti qeveritare dhe i bie që në një farë forme e përkrah këtë, ndërsa partia opozitare Aleanca nuk ka pasur ndonjë reagim. Realisht partitë shqiptare janë në gjendje shumë të vështirë dhe në pozitë të palakmueshme’’, deklaroi Ratkoceri.