Sipas Agjencisë së Statistikave të Kosovës, shkalla e papunësisë në nivel vendi është 27 për qind. Bazuar në të dhënat për tremujorin e katërt të vitit 2020, ASK-ja ka thënë se papunësia është më e theksuar te gratë me 33.5 për qind, e 24.3 për qind te burrat. Shkalla më e theksuar e papunësisë është te grupmoshat 15-24-vjeçare me 49.9 për qind. Shkalla prej 27 për qind e papunësisë në këtë tremujor, është për 2.4 për qind më e lartë se ajo që ishte në tremujorin e tretë (24.6%).
Në raportin e ASK-së bëhet e ditur se dy të tretat e popullsisë në Kosovë janë në moshë pune, 15-64-vjeçare. Në kuadër të kësaj moshe, shkalla e pjesëmarrjes në fuqinë punëtore është vetëm 41.3 për qind. 58.7 për qind është shkalla e fuqisë joaktive, me fokus të veçantë te femrat me 76.2 për qind dhe burrat 40.9 për qind. Pra rreth 60 për qind e njerëzve në Kosovë, e që janë në grupin e popullatës në moshë pune, janë të papunë e as nuk kërkojnë vende pune.
Edhe në tremujorin e tretë fuqia joaktive ka qenë e lartë, 60.0 për qind.
Femrat janë të punësuara, kryesisht në sektorët e arsimit, tregtisë dhe kujdesit shëndetësor, me 51.5% të tyre, ndërsa meshkujt janë kryesisht të punësuar në sektorët e ndërtimtarisë, tregtisë dhe prodhimit me 43.8%. Sektorët ekonomikë, që prijnë me punësim, vazhdojnë të jenë: tregtia me 15.3%; prodhimi me 13.0%; ndërtimtaria me 11.1%; dhe arsimi me 9.9%. Ndërsa, sektorët e tjerë marrin pjesë me përqindje më të vogël në punësim.
Sa i përket të të punësuarve me kontrata, del se 44.6% e personave të punësuar kanë kontratë të përhershme në punën e tyre kryesore, ndërkohë që 55.4% kanë kontratë të përkohshme.
Për realizimin e këtij raporti, ASK-ja thotë se e ka harmonizuar metodologjinë dhe standardet me rekomandimet e Eurostatit.
