1 perditesime
Arbëri

Punëtorët e Lotarisë kërkojnë miratimin e ligjit dhe kthimin në vendet e punës

Punëtorët e Lotarisë kërkojnë miratimin e ligjit dhe kthimin në vendet e punës
Foto: Alban Bujari/KOHA
11:42

Punëtorët e Lotarisë kërkojnë miratimin e ligjit dhe kthimin në vendet e punës

Sindikata e Punëtorëve të Lotarisë ka protestuar sërish para ndërtesës së Qeverisë.

Ata po kërkojnë miratimin e ligjit për Lotarinë e Kosovës dhe kthimin në vendet e punës, duke shtuar se do të vazhdojnë me protesta deri në përmbushjen e kërkesave.

“Kemi dalë në protestë edhe sot, duke mos anashkaluar protestat e kaluara për të drejtat tona dhe miratimin e kërkesave. Që dy vjet kanë kaluar që Lotaria është pezulluar, janë pezulluar të gjithë lojërat e fatit, asnjë hap nuk është ndërmarrë. Do të dalim në protestë deri në miratimin e ligjit. Deri në 67 punëtorë kemi mbetur papunë, tash e një vit s'kemi marrë paga as asgjë”, kanë thënë për media.

Ata kanë përmendur se pavarësisht se është mbyllur Lotaria e Kosovës, një e tillë vazhdon punën në Mitrovicë të Veriut, e iniciuar nga Lotaria e Serbisë.

Image

Lotaria serbe në Mitrovicë të Veriut

 

 

08:29

Punëtorët e Lotarisë së Kosovës sërish në protestë

Punëtorët e Lotarisë së Kosovës do të mblidhen sot nga ora 11:00, për të protestuar para Qeverisë së Kosovës.

Ata kërkojnë miratimin e ligjit për Lotarinë e Kosovës dhe paralajmërojnë se do të vazhdojnë me protesta deri në përmbushjen e kërkesave.

Qeveria i ka premtuar Sindikatës së Punëtorëve të Lotarisë së Kosovës se do të gjejë një zgjidhje për punëtorët, por kjo ende nuk është realizuar.

Punëtorët e Lotarisë së Kosovës gjenden në një situatë të rënduar, pasi tash e një vit nuk kanë marrë paga. Madje, ata kishin protestuar edhe më 16 qershor, por askush nga zyrtarët qeveritarë nuk është takuar me ta.

Kryetari i Sindikatës së Punëtorëve të Lotarisë, Shkumbin Goçi tha se kishte tentuar të takohet me zyrtarët nga Qeveria e Kosovës, por një gjë e tillë ishte e pamundur.

Në dhjetor 2020, ish-Qeveria Hoti kishte vendosur për rithemelimin e Lotarisë së Kosovës, me arsyetimin se 62 punëtorë kishin mbetur pa punë pasi në prill 2019 Kuvendi kishte miratuar Ligjin për Ndalimin e Lojërave të Fatit. Por në Kuvend projektligji s'kishte marrë përkrahjen e deputetëve dhe me shpërndarjen e tij, ai ka mbetur pa u miratuar./KSP