2 perditesime
23:30

Totaj: Haskuka me stafin kanë shkuar në ekskursion në Antali, larg ngjarjeve në Prizren

Kandidati i PDK-së për kryetar të komunës së Prizrenit, Shaqir Totaj, ka thënë se do të ketë një program të qeverisjes për katër vjet ende pa e marrë mandatin.

Ai në Interaktiv të KTV-së ka thënë se ka filluar ta përgatisë një program qeverisës për Prizrenin, i cili sipas tij përfshinë disa projekte.

Totaj ka folur për ngecjet që sipas tij ka bërë gjatë qeverisjes kryetari aktual i Prizrenit, Mytaher Haskuka.

“Ka pasur shumë ngecje dhe do ishte vështirë të gjej diçka që ka funksionuar sepse ka pasur ngecje në pothuajse çdo projekt. Ka pasur ngecje në keqmenaxhim të buxhetit të komunës në financa publike, për tri vite kemi pasur suficite buxhetore që është diku afër 20 milionë, kemi pasur ngecje në menaxhim të Qendrës Historike të Prizrenit, kemi kaos të trafikut urban në qytet dhe kemi shumë probleme sa i përket DKA-së. Kemi pasur shumë raste të punësimeve nepotike”, ka thënë ai.

Totaj ka përmendur edhe projekte të tjera që sipas tij kanë ngecur këto vite. Ka shtuar se Haskuka gjendet aktualisht në Antalia me stafin për pushim, derisa shumë ngjarje ndodhin në Prizren.

“Në dy muaj e fundit u është ndaluar pagesa e shpenzimeve të transportit arsimtarëve që udhëtojnë. Ka qenë e paraparë për tërë vitit, kanë qenë mjetet e ndara dhe është ndalë. Në anën tjetër në Prizren është duke punuar një kompani e cila nuk është e Prizrenit me një projekt për të cilin nuk e dimë çka po ndodhë sepse nuk ka transparencë dhe Qendra Historike e Prizrenit është shndërruar në një punishte të madhe. Kurse z. Haskuka ka shkuar në ekskursion me stafin e tij në Antalia, ai është larg ngjarjeve”, ka thënë ai.

23:17

Totaj: Shkarkimi i ambasadorëve u bë në mënyrë arbitrare

Nënkryetari i PDK-së, Shaqir Totaj, e ka vlerësuar arbitrare mënyrën se si janë shkarkuar 12 ambasadorë të emëruar politikisht nga ministrja e Punëve të Jashtme, Donika Gërvalla.

Totaj në Interaktiv të KTV-së ka thënë se do të duhej të bëhej vlerësimi i performancës, por jo të shkarkohen 12 me një lëvizje.

“Nuk do të hyjë në vlerësim të performancës së ambasadorëve. Por mënyra se si shkarkohen 12 apo 13 udhëheqës të misioneve diplomatike të Kosovës nëpër vende të ndryshme të botës, mënyra e tillë nuk duhej të ndodhte. Do të duhej vlerësimi i performancës, e ku ka nevojë për ndryshim atëherë jemi në rregull. Duhet ecur para. Por, jo në mënyrë arbitrare me një lëvizje të shkarkohen 13 ambasadorë pa dhënë asnjë arsyetim. Unë nuk pajtohem me mënyrën si është bërë. Unë pajtohem se duhet të lëvizim para, duhet të kemi profesionalizëm, të kemi ngritje të nivelit të performancës e cilësisë. Mënyra se si ajo ka vepruar duke shkarkuar 13 ambasadorë me një lëvizje nuk është në rregull”, ka thënë Totaj.

23:11

Totaj për ftesën e Kurtit: Kishte tema për të cilat kompetente ekskluzivisht është Qeveria

Partia Demokratike e Kosovës ka refuzuar ftesën e kryeministrit Albin Kurti i cili ditë më parë ftoi partitë opozitare në takim për të diskutuar rreth çështjeve me “interes nacional”.

Nënkryetari i kësaj partie, Shaqir Totaj, ka thënë në Interaktiv se ftesa u refuzua për shkak se në të nuk ishte e specifikuar ndonjë temë e veçantë.

“Ftesa e Kurtit nuk ka qenë e specifikuar, nuk ka përmbajtur tema specifike për të cilat do diskutohej dhe në interes nacional. Kanë qenë tema për të cilat kompetent është ekskluzivisht Qeveria”, ka thënë ai.

Ai ka thënë se kanë qenë të cekura disa tema të tjera, të cilat PDK-ja ka konsideruar se nuk janë në kompetencë të saj t’i diskutoj parimisht.

“Nuk është specifikuar se do të diskutohet si temë e veçantë dialogu, port tema të tjera si çështja e marrëdhënieve me Brukselin. Këto tema janë të rëndësishme por janë në kompetencë të MPJ-së. Në ftesë nuk ka qenë e specifikuar çështja e dialogut, prandaj ne nuk kemi marrë pjesë”, ka shtuar Totaj.