Për dialogun me Serbinë s’duhet të ketë nguti duke premtuar me afate kohore dhe se për këtë proces duhet të ketë përgatitje të mira e një marrëveshje të qëndrueshme, ka thënë lideri i Lëvizjes Vetëvendosje, Albin Kurti, në një takim që ka pasur me ambasadorin e Mbretërisë së Bashkuar në Kosovë, Nicholas Abbott.

Siç ka njoftuar VV-ja, Kurti në këtë takim mku u urua nga Abbotti për fitoren në zgjedhjet e 14 shkurtit, është shprehur i bindur se qeveria e re do të konsolidohet shpejt.

Sipas njoftimit, Kurti e ka njoftuar Abbottin se punësimi, drejtësia e pandemia dhe sigurimi i vaksinës janë prioritetet e tij.

“Ai foli edhe për një bashkëpunimin më të përgjegjshëm e cilësor mes qeverisë së re dhe opozitës në Kuvendin e Kosovës, si dhe për dialogun me Serbinë për të cilin përsëriti që nuk duhet të ngutemi duke premtuar me afate kohore dhe se dialogu duhet të jetë i përgatitur mirë e marrëveshja e qëndrueshme. Në fund, të dy u dakorduan për bashkëpunim në projekte konkrete që do të ndihmonin si shtetndërtimin demokratik e zhvillimin ekonomik të vendit tonë, ashtu edhe thellimin e marrëdhënieve bilaterale midis dy vendeve tona në të ardhmen”, thuhet në njoftim të VV-së.

Në anën tjetër, në njoftimin e tij për këtë takim, Abbott ka thënë shkurt se “e ka uruar VV-në për fitoren” dhe se “kanë diskutuar për planet për qeverinë, tejkalimin e pandemisë dhe potencialin për bashkëpunimin bilateral për të ardhmen”.

Qe një kohë Kurti vazhdon të përsërisë se dialogu me Serbinë nuk është top-prioritet i tij.

Gjatë ditës, Kurti ka pasur një takim edhe me Ulrika Richardsonin, koordinatore për Zhvillim e Agjencive të Kombeve të Bashkuara, me të cilën janë pajtuar se “lufta kundër korrupsionit për të krijuar mundësi të barabarta për të gjithë dhe zhvillimi ekonomik që ka në bazë kohezionin social janë veprime të domosdoshme drejt një shoqërie demokratike ku mbizotëron mirëqenia dhe prosperiteti”.

Në zgjedhjet e 14 shkurtit, VV-ja e Kurtit doli e para me mbi 47 për qind të votave, teksa ende s’janë numëruar votat me kusht dhe ato nga jashtë.