2 perditesime
20:26

Dalin detaje për aksidentin në Rrugën e Kombit, mbijetoi 3-vjeçarja

Policia e Shqipërisë ka publikuar detaje shtesë për aksidentin fatal në Rrugën e Kombit, që të enjten mori jetën e katër personave, ndërsa një fëmijë është lënduar rëndë. Siç bëhet e ditur, në rrugën Milot-Rrëshen janë përplasur një veturë “Citroen” dhe një kamion, të dy me targa të Kosovës. Si pasojë e aksidentit, në veturën “Citroen” kanë vdekur tre anëtarë të familjes Avdijaj nga Kosova dhe një i afërm i tyre. Ka mbijetuar vetëm një vajzë 3-vjeçare.

Siç ka mësuar KOHA, të vdekur janë B.Avdijaj (45-vjeç), A.Avdijaj (32-vjeçare), M.Avdijaj (6-vjeçare), K.K. (11-vjeç), ndërsa e lënduar ka mbetur 3-vjeçarja V.Avdijaj.

Nga Spitali i Traumës kanë thënë se gjendja e trevjeçares është e rëndë, por se ka shpresa se mund të mbijetojë. Ajo ka një këmbë të thyer.

Vetura kishte qenë duke ecur në drejtim të Shqipërisë, e kamioni në drejtim të Kosovës.

Trupat e viktimave janë transportuar në morgun e spitalit të Rreshenit.

“Në aksin rrugor Milot-Morinë, në afërsi të një karburanti në Rreshen, mjeti tip ‘Citroen’ me të cilin udhëtonte një familje kosovare është përplasur me mjetin tip kamion me drejtues shtetasin I.I.,banues në Kosovë. Për pasojë kanë humbur jetën drejtuesi i mjetit tip ‘Citroen’ , bashkëshortja e tij dhe 2 fëmijët dhe është plagosur fëmija i mitur, i cili është transportuar në spitalin e Traumës Tiranë. Grupi hetimor në vendngjarje punon për sqarimin e plotë të shkakut dhe rrethanave të ngjarjes”, thuhet në njoftimin e Drejtorisë së Policisë së Qarkut Lezhë.

Shkak i aksidenti dyshohet se ka qenë parakalimi i gabuar nga automjeti “Citroen” me të cilën po udhëtonte familja nga Kosova dhe shpejtësia e lartë. Kjo ka bërë që ata të përplasen me kamionin, duke u marrë edhe jetën 4 anëtarëve të familjes dhe lënë të lënduar rëndë fëmijën tjetër.

Numri i aksidenteve në Rrugën e Kombit që nga ndërtimi i saj ka qenë i madh. Kjo edhe për shkak se rruga nuk ka përfunduar, megjithëse kanë kaluar 11 vjet që nga lëshimi për qarkullim. Në këtë segment ka ndodhur pjesa më e madhe e aksidenteve me pasojë vdekjen në Rrugën e Kombit. Vendi ku ka ndodhur aksidenti, pikërisht në segmentin Milot-Rreshen është me dy kalime.

Ndërkohë prej më shumë se dy vjetësh edhe pse e pa përfunduar, kjo rrugë është me pagesë duke filluar me 5 euro. Gjithsesi, shuarja e familjes nga Kosova, është ngjarja e dytë e rëndë me pasojë aksidentet rrugore në Shqipëri me viktima shtetas të Kosovës. Më 14 tetor të vitit 2004, si pasojë e një aksidenti tragjik në Fushë-Arrëz, humbën jetën 15 gjimnazistë të Malishevës dhe u plagosën 35 të tjerë./Bashkim Shala

19:22

Policia konfirmon se 4 viktimat në Rrugën e Kombit janë nga Kosova, një fëmijë në gjendje të rëndë

Policia e Shqipërisë ka njoftuar se viktimat në aksidentin në Rrugën e Kombit, janë nga Kosova.

Në njoftimin dërguar A2News, Policia ka thënë se “një familje kosovare është përplasur me mjetin tip kamion me drejtues shtetasin I.I, banues në Kosovë”.

Ndërkaq, konfirmohet edhe se në veturën ku kanë humbur jetën katër personat, ishin drejtuesi i mjetit, bashkëshortja e tij dhe dy fëmijët. Një tjetër fëmijë i tyre është lënduar rëndë.

“Në aksin rrugor Milot-Morinë, në afërsi të një karburanti në Rreshen, mjeti tip ‘Citroen’ me të cilin udhëtonte një familje kosovare është përplasur me mjetin tip kamion me drejtues shtetasin I.I.,banues në Kosovë. Për pasojë kanë humbur jetën drejtuesi i mjetit tip “Citroen” , bashkëshortja e tij dhe 2 fëmijët dhe është plagosur fëmija i mitur, i cili është transportuar në spitalin e Traumës Tiranë. Grupi hetimor në vendngjarje punon për sqarimin e plotë të shkakut dhe rrethanave të ngjarjes”, njoftoi Policia.

19:03

Dyshohet për katër kosovarë të vdekur në një aksident në Rrugën e Kombit

Katër persona nga Kosova dyshohet se kanë vdekur në një aksident në Rubik të Shqipërisë, njofton Top Channel .

Përveç tyre, raportohet se është edhe një i lënduar.

TCH ka mësuar se viktimat janë anëtarë të së njëjtës familje që po udhëtonin nga Kosova.

Ndërkaq, konfirmimi është marrë edhe nga Policia e shtetit.

“Në aksin Rrugor Rrëshen Rubik, Rruga e Kombit, te karburant ‘Toma’, ka ndodhur një aksident rrugor midis mjeteve Citroen dhe mjeti kamion ku si pasojë e aksidentit dyshohet për 4 viktima”, ka thënë Policia.