4 perditesime

Deputeti i LDK-së, Fatmir Rexhepi, ka treguar arsyet pse nuk do të kandidojë në zgjedhjet e ardhshme.

21:26

Rexhepi flet për kontratën me elektoratin që u shkel nga LDK-ja

Deputeti Fatmir Rexhepi nuk do të jetë në listën e kandidatëve për zgjedhjet e reja, por ai edhe në të kaluarën ka pasur raste kur nuk ishte në listën e LDK-së për shkak të qëndrimeve të tij që binin ndesh me ato të udhëheqësve të partisë. I ndodhi dy herë të mos jetë më listë, më 2010 dhe 2017. Dhe tash më 2021 nuk do të jetë.

Edhe në mandatin që po shkon drejt fundit, Rexhepi shpesh nuk ndante të njëjtin qëndrim me atë të partisë.

Ai, në një intervistë në Deskun e KOHËS, tregoi se më 2014 ishte shkelur një kontratë që LDK-ja kishte bërë me elektoratin dhe për pasojë, në zgjedhjet e vitit 2017, ai nuk ishte në listën e kandidatëve për deputetë.

Thotë se kontrata kishte të bënte se nuk do të bëhej kurrë koalicion me PDK-në, gjë që pas zgjedhjeve ndodhi.

“Më 2014 e patëm një kontratë me elektoratin, një muaj cep më cep, në gjithë Kosovën ku kemi shkuar, edhe në diasporë, kemi kërkuar votën me premtimin se nuk do të shkojmë në koalicion me PDK-në, me lidershipin që kishte, kjo ka qenë një kontratë me elektoratin. Thoshim ‘kurrë s’kemi për të bërë koalicion. Nëse kështu ka qenë kontrata me elektoratin, neve na ndodhi një kthesë, pavarësisht se u thirr Këshilli i Përgjithshëm. Nuk ishte ai vendim ashtu siç është shpjeguar më vonë, unë kam diskutuar në Këshillin e Përgjithshëm dhe kam deklaruar publikisht se nuk votoj puro koalicion vetëm me PDK-në. U kam thënë ‘ju anëtarë që nuk jeni deputetë mundemi me marr vendim, por në parlament nuk mundemi me marrë votën time’, sikurse që nuk e kanë pasur edhe të disa kolegëve tjerë”, ka thënë Rexhepi për koalicionin që ishte lidhur mes LDK-së e PDK-së pas zgjedhjeve të 2014-s.

Rexhepi tha se ai dhe disa të tjerë e respektuan këtë kontratë me elektoratin, pavarësisht “pasojave”.

Ai vlerëson se sikur LDK-ja më 2014 të shkonte në opozitë, do të kthehej më 2017 si forcë e parë.

“I kam lutur të shkojmë në opozitë në atë kohë, një vjet-dy, për hir të partisë, jo timen. Me frymën që ishte në atë kohë, me lidershpin e profës (Isa Mustafa v.j.) ne do të dilnim parti e parë, kurrë VV-ja s’do të mund të dilte e para”, ka thënë Rexhepi.


Rexhepi: Nuk kam dal kurrë kundër vendimeve të forumit të partisë

Rexhepi ka thënë se nuk ka dalë kurrë kundër vendimeve të forumit të LDK-së. Ai thotë se nuk ka dalë kundër vullnetit, elektoratit dhe kontratës me elektoratin.

“Ata e kanë dhënë propozimin edhe mua me më largu prej këshillit të përgjithshëm, edhe Haxhi Avdylin, për shkak se kemi dalë kundër vendimeve të forumit të partisë. Unë po e përsërisë edhe njëherë, kurrë në jetë jo. Nuk kemi dalë kundër vullnetit, elektoratit dhe kontratës me elektoratin”, ka thënë Rexhepi në DESKUN e KOHËS.

21:13

Rexhepi: Po të kishim funksionuar normalisht në parlament, Kushtetuesja do të vendoste ndryshe

Deputeti i LDK-së, Fatmir Rexhepi, ka thënë se partitë politike shqiptare nuk i kanë bërë mirë jetës politike në vend.

Ai ka thënë se Gjykata Kushtetuese në interpretimin juridik e ka pas të drejtë vetëm për votën e deputetit Etem Arifi.

Rexhepi ka thënë se Kushtetuesja ka dalë jashtë kompetencave të veta sepse ajo nuk mund të caktojë datë të zgjedhjeve.

“Kushtetuesja nuk e ka të drejtën sepse parlamenti është ai që e merr vendimin, në qoftëse e ka pas atë ka mundur të kthehet në votim, ose në forma të tjera. E ka cenuar, e ka gjetur të lënduar, ne kemi qenë të lënduar sepse kemi mosmarrëveshje në parlament po të kishim funksionuar si duhet në parlament unë mendoj që edhe Gjykata Kushtetuese ndryshe do të vepronte”, ka thënë ai.

21:05

Rexhepi: Do të duhej të zgjedhej presidenti, pastaj zgjedhjet

Deputeti i LDK-së, Fatmir Rexhepi, në emisionin Desku në KTV ka thënë se partitë politike së pari do të duhej të zgjedhnin presidentin e më pas të shkonin në zgjedhje.

“Duhet të them që partitë politike shqiptare për vlerësimin tim nuk i kanë bërë mirë jetës politike në vend, që nuk janë ulur, që në periudhën kohore sa patën mundësi ta zgjedhin presidentin e vendit”, ka thënë Rexhepi. “Pra, që të gjitha partitë prej Vetëvendosjes, LDK-së, PDK-së dhe të tjera. Kurdo që të ndodhë t'i ke me u ulë me u marrë vesh, pavarësisht në një pozicion a do të jesh një deputet më shumë a më pak, pesë më shumë apo pesë më pak”.

Ai tutje ka shtuar se, “për mos me ardhë në atë pozicion që të bëhej pastaj një marrëveshje politike për të gjetur një kuadër i cili do t'i përmbushë të gjitha ato kritere për të cilat mendojnë partitë t'ia japin besimin do ta kishim pasur shumë më të lehtë si vend, pra do ta kishim pasur një president të zgjedhur”.

20:51

Rexhepi: LDK-ja duhet ta gjejë një alternativë të kohës që është më e mirë

Deputeti i Lidhjes Demokratike të Kosovës, Fatmir Rexhepi, ka thënë se partia pjesë e të cilës është ai, duhet të gjejë një alternativë të kohës e cila do të ishte më e mirë.

Ai në DESKU-n e KOHËS ka thënë se ka qenë koha që publikisht të bëjë thirrje që të gjendet një alternativë tjetër për LDK-në.

“Mendoj që me këtë mesazh i kam kontribuar partisë pastaj është në të drejtën e forumeve tjera që të kenë qëndrimin e tyre”, ka thënë ai

20:48

Rexhepi tregon arsyet pse nuk do të kandidojë në zgjedhje

Deputeti i LDK-së, Fatmir Rexhepi, ka treguar arsyet pse nuk do të kandidojë në zgjedhjet e ardhshme.

Ai vendimin për të mos kandiduar e ka bërë të ditur në Kuvendin e Kosovës, gjatë seancës të mbajtur këtë javë.

“Të mbajmë një mision politik, vizion politik, ta ruajmë kontratën me elektoratin. Ta ruajmë edhe nëse duhet me kosto të shkohet në opozitë, apo të mos bëhet koalicion kur nuk duhet. Apo ta ruajmë koalicion edhe kur duhet bërë kurban, si në rastin e COVIDIT. Në rastin kur krejt shtetet ndërtonin bashkim, ne nuk gjetëm mirëkuptim me partner, e kjo më ka penguar e shtyrë të marrë një vendim, që në radhë të parë është dukur kundër vendimit në forume. Nuk kam dashur të krijojë protagonizëm, por kam dashur të mbajë qëndrim parimor. Prandaj, këto kanë ndodhë edhe më herët edhe tash. Ky vit ka qenë vit i rëndë, kur është dashur të merremi me vendime të mëdha. Ana tjetër është ana që kam kërkuar qe dy tre muaj, kam pasur perceptim t’i ndihmojë LDK-së. Te bëjë një mesazh politik, e jo t’i kundërvihem udhëheqjes, lidershipit të partisë. Thirrja ime ka qenë që forumet deri më 23 dhjetor t’i japin një shanse që të fillojnë. Në kuptimin e këtij mesazhi kam pasur vizion për formë demokratike e më të shpejtë brenda lidershipit të partisë. Sepse jemi konsumuar dhjetë vjet me një model, e nuk ka dhënë rezultat, s’po del mirë. Thashë që është më mirë në krye të partisë të vijë lider që nesër të jetë vet kryetar i partisë, të jetë i nominuar për kryeministër e të shkojë vet në zgjedhje. Të ketë format të ri politik, elitë intelektuale që i duhet, e jo kuadër që ka ndikim, ose monopol prej grupeve të caktuara. Një ngritje si në ditët e vjetra të LDK-së, në kohët e presidentit Rugova ose presidentit Sejdiu. Kjo nuk ndodhi. "Ky vizion i imi nuk pati përkrahje, e vlerësova se është momenti të mos jem pengesë eventuale”, ka thënë Rexhepi në DESKUN e Kohës.