Kamberi: S’mund të ketë kompromis derisa Serbia nuk flet hapur për krimet e kryera në Kosovë

Deputeti shqiptar në Kuvendin e Serbisë, Shaip Kamberi, vlerëson se nuk mund të ketë pajtim e as marrëveshje mes Kosovës e Serbisë, derisa kjo e fundit mohon krimet që ka shkaktuar në Kosovë.

Kamberi në një intervistë në Interaktiv të KTV-së, ka thënë se Serbia, fillimisht duhet të kërkojë falje, të pranojë krimet dhe të ballafaqojë popullin serb me të vërtetën.

“Në Serbi me plot gojë flasin për një kompromis me shqiptarët. Unë nuk di çka nënkupton ai kompromis, po të jenë të sinqertë, atëherë ndërtimi i kompromisit me një shtet, me një popull me të cilin ka qenë deri dje në luftë apo ndaj të cilit ka marrë masa ta shkatërrojë, nënkupton se së pari duhet ta ballafaqosh popullin tënd me ato të këqija. S’mund të ketë kompromis e pajtim, derisa Serbia nuk flet hapur për krimet e masakrat që ka shkaktuar në Kosovë”, ka thënë Kamberi.

Ai ka folur edhe për fjalimin e tij të famshëm të javës së kaluar që bëri bujë kudo. Ai akuzoi krerët e Serbisë për gjithçka të keqë që u kanë bërë Kosovës dhe shqiptarëve. Ftoi edhe kryeministren Ana Bërnabiq, në seancën kur u votua Qeveria e saj, që së bashku të vizitojnë Batajnicën, ku shumë vite më parë janë gjetur trupa të shqiptarëve të vrarë në luftë.

“Ajo është dashur të përmendet pikërisht në zgjedhjen e qeverisë, ishte një moment i mirë. Por nuk mund të ketë pajtim në rast se ti fsheh varrezat masive, nuk mund të ketë pajtim derisa ti mohon se ke kryer krime në Kosovë. Nuk mund të ketë pajtim duke barazuar gjërat me mënyrën ‘keni vrarë ju kemi vrarë edhe ne”, tha Kamberi.

Deputeti shqiptar në Kuvendin e Serbisë, Shaip Kamberi, ka thënë se pas fjalimit të tij në Kuvend, kishte tendencë nga Qeveria e Ana Brnabiqit për shmangien e temave që ai i ka përmendur.

Ai në Interaktiv të KTV-së ka thënë se nuk mund të ketë bashkëpunim mes grupit parlamentar dhe një opozite që nga jashtë parlamentit, organizon tubime me thirrjet “Vuçiq shqiptar”.

“Unë e thashë qartë se nuk mund të ketë bashkëpunim mes nesh si grup parlamentar dhe një opozite që është jashtë parlamentit, e cila organizon tubimet e qytetarëve para parlamentit, dhe bërtasin 'Vuçiq shqiptar'. Nuk mund të ketë logjikë bashkëpunimi një opozitë e cila në atë formë, e ndjell urrejtjen ndaj shqiptarëve. Nuk mund të jetë opozita e tillë alternative e një regjimi totalitar, një opozitë e cila ka gjoja një grup demokrat dhe një grup nacionalist”, ka thënë Kamberi.

Ai tutje ka potencuar se për herë të parë, pesë partitë politike shqiptare janë bashkuar dhe kanë marrë pjesë bashkarisht në ndërtimin e një partneriteti, duke hapur dialogun për planin shtatë pikësh.

“Pika jonë kryesore ishte hapja e dialogut për planin shtatë pikësh. Megjithatë, po shihet që s'ka një vullnet dhe meqenëse është trajtuar si qeveri e kontinuitetit, e ky kontinutet nuk ndërtohet nga Qeveria Brnabiq”, ka thënë ai.

Shaip Kamberi nuk pret që Serbia të respektojë të paktën Kushtetutën e saj kur bëhet fjalë për respektim të të drejtave të shqiptarëve në Serbi.

Ai thotë se derisa serbët i kanë të garantuar ulëset të parlamentin e Kosovës, dikasteret në Qeveri dhe institucione të tjera, përfaqësimi i shqiptarëve në Serbi është diskriminues.

Deputeti shqiptar në Kuvendin e Serbisë, thotë se shqiptarët janë të diskriminuar edhe në institucionet që veprojnë në komunat shqiptare të Luginës së Preshevës.

“Qeveria serbe nuk është e gatshme të dëgjojë asnjë kritikë dhe ne nuk mund të presim që ajo me vullnet do të pranojë një temë të tillë, sepse ajo konsideron se bisedimet janë për Kosovën dhe territorin e Kosovës, për pakicat në Kosovë, duke mos prekur territorin e vet dhe pakicat që jetojnë atje. Megjithatë nëse Kosova si shtet merr obligime me i garantu pakicës serbe të drejta edhe mbi ato që i ka këtu, atëherë ka të drejtën morale, por edhe të drejtën politike e kombëtare që të kërkojë e të insistojë që Serbia të japë garanci kushtetuese e juridike për të drejtat e shqiptarëve atje”, ka thënë Kamberi në nëj intervistë në KTV.

Ai tregon se shqiptarët diskriminohen ë çdo fushë e më së shumti në punësim.

“Është çështja e nënpërfaqësimit, shqiptarët janë të nënpërfaqësuar në institucionet e shtetit, flas për ato institucione që veprojnë në komunat tona, ne nuk kërkojmë të jemi në institucionet qendrore në Beograd. Kemi për shembull shërbimin kadastral që nuk ka asnjë shqiptar, flasim për çështjet më banale”, ka thënë Kamberi.

Deputeti shqiptar në Kuvendin e Serbisë, Shaip Kamberi, ka thënë se pasi që është refuzuar ideja e ndryshimit të kufijve në dialogun Kosovë – Serbi, e vetmja mundësi e mbetur për të përmirësuar kushtet e shqiptarëve në Serbi është parimi i reciprocitetit.

“Është dëshirë e shqiptarëve të Luginës së Preshevës, qëndrim politik në referendumin e vitit 98. Mirëpo jemi në terrenin politik që në mënyrë reale duhet të pritet ajo që është e mundur të realizohet e duke pa qëndrimet kryesore në Prishtinë por edhe Bashkimi Evropian që nuk pranojnë parimin e ndryshimit të kufijve, mundësia tjetër që mbetet për të shfrytëzuar dhe që besojmë se do të ndihmojë në përmirësimin e kushteve të jetës së shqiptarëve është aplikimi i parimit të reciprocitetit, sepse Serbia vazhdimisht po luan me standarde të dyfishta. Ajo kërkon maksimumin që sipas nesh është maksimum që Kosova i garanton me Kushtetutë, ligjet e veta, pakicës serbe, që është mbi standardet që BE-ja parasheh për pakicat. Por e njëjta Serbi na mohon ato të drejtat elementare dhe flet për demokraci të përparuar nëse një deputet ka të drejtë të flasë në parlament. Kjo flet për logjikën që mbizotëron në Serbi, totalitare, sipas të cilës një pjesëtar i pakicës i ka të gjitha të drejtat vetëm nëse mjafton të flasë”, ka thënë ai në Interaktiv.

Sipas Kamberit s’mund të ketë shqiptarë që pranojnë të jenë pjesë e Qeverisë në Serbi nëse një qeveri betohet duke thënë se do të angazhohet që ta kthejë Kosovën brenda Serbisë.

Ai ka shtuar se i sheh si hapa të mirë hapjen e zyrës për Luginën e Preshevës nga Qeveria e Kosovës dhe krijimi i fondit për Luginën nga dy qeveritë shqiptare.

Ka thënë se nuk mund të ketë rehati në mes dy shteteve, nëse marrëveshja finale nuk përfshin edhe Luginën e Preshevës.

“Pa përfshirjen e Luginës në dialog, s'mund të ketë rehati a marrëveshje të plotë mes Kosovës e Serbisë. Është e pakuptueshme me fqinjin të pajtohesh nëse ai vazhdon ta keqtrajtojë vëllain. Nëse do të arrijmë në marrëveshje gjithëpërfshirëse duhet të kërkohen garanca për shqiptarët atje”, ka shtuar ai.

Deputeti shqiptar në Kuvendin e Serbisë, Shaip Kamberi, ka deklaruar se Qeveria e re e Serbisë, në krye me kryeministren Ana Brnabiq, do të vazhdojë të mos bëjë asgjë për Luginën e Preshevës.

Ai në Interaktiv të KTV-së ka thënë kjo se u bë e ditur në ekspozën e Brnabiqit para deputetëve, ku ka thënë se kjo qeveri do të jetë qeveri e kontinuitetit, ndërsa insistim i tij do të mbetet që të nxisin ndërgjegjen e bashkësisë ndërkombëtare.

“Reagimet që ishin të zonjës Brnabiq si kryeministre e re, të kryeparlamentarit Daçiq, tash edhe të Presidentit Vuçiq, nuk japin shpresë se do të ketë diçka pozitive. Vetë zonja Brnabiq në ekspozen që pati para deputetëve tha se kjo do të jetë një qeveri e kontinuitetit. Për neve kontinuiteti nënkupton të mos ketë asgjë përsëri në Luginë të Preshevës, asgjë në komunat tona dhe me të drejtë, ne nuk e dhamë votën për atë qeveri. Ajo që mbetet është që me insistimin tonë, me hapjen e temave të këtilla në parlament, të arrijmë të nxisim ndërgjegjën e bashkësisë ndërkombëtare”, ka deklaruar Kamberi.

Ai tutje ka thënë se bashkësia ndërkombëtare ka një pjesë të fajit pasiq ëe ka lejuar Serbinë të sillet në formë të gabuar ndaj pakicave.

“Është shumë e qartë që nëse bashkësia ndërkombëtare nuk insiston në përmbushjen e parimeve të kapitujve kryesor, e sidomos respektimit të drejtave të njeriut dhe të pakicave, do të jetë e vështirë që ne të arrijm rezultate konkrete”, ka thënë tutje ai.

Deputeti shqiptar ka deklaruar se vazhdimi i dialogut Kosovë-Serbi është mundësi që në tryezën e bisedimeve, të shtrohet edhe çështja e Luginës së Preshevës për t’u njohur të drejtat e pakicave, siç janë shqiptarët.

Deputeti shqiptar në Kuvendin e Serbisë, Shaip Kamberi, ka thënë se reagimi i presidentit të këtij vendi Aleksandar Vuçiq dhe i krerëve të tjerë institucional në fjalimin e tij para deputetëve, tregon se ai kishte të drejtë për temat që hapi në ditën kur u votua Qeveria e Serbisë, javën që shkoi.

Ai në një intervistë në Interaktiv të KTV-së, ka thënë se këto tema duhet të marrin përgjigje nga ata që janë përgjegjës.

“Nëse niveli i demokracisë së një shteti matet me atë se a guxon apo nuk goxon të flasë një deputet, kjo flet qartë se në çfarë gjendje ai shtet. Fakti se në atë parlament prej 250 deputetësh vetëm gjashtë janë opozitarë, është treguesi tjetër i një demokracie të brishtë, një totalitarizmi që mbretëron në Serbi, siç e thash edhe në parlament. Bëhet fjalë për ndërtimin e një shteti të një personi, i cili vendos për gjithçka dhe vet reagimet e tyre dëshmojnë qartë se kam pasur të drejtë. Temat që i kam hapur duhet të marrin përgjigje të drejtpërdrejta e jo të bishtnohen siç në vazhdimësi bën Serbia”, ka thënë Kamberi.

AI tha se pjesa liberale në Serbi, që është pakicë e ka mbështetur në forma të ndryshme atë dhe fjalimin që mbajti.

© KOHA. Të gjitha të drejtat janë të rezervuara.