Në ndryshimet e Ligjit për Automjete hiqet detyrimi për homologim për veturat që vijnë nga Evropa

Në Komisionin Parlamentar për Infrastrukturë ka kaluar projektligji për ndryshim/plotësimin e Ligjit për Automjete, që heq detyrimin për homologim për vetura të reja dhe të vjetra që vijnë nga shtetet e Bashkimit Evropian, Zvicra dhe Norvegjia, ka bërë të ditur deputeti i Grupit Parlamentar të Vetëvendosjes Hekuran Murati.

Murati ka thënë se me këtë pikë po zbatohet vullneti i qytetarëve nënshkrues të peticionit të vitit të shkuar, që kishte grumbulluar më shumë se 10 mijë nënshkrime në kërkesën për ndërprerje të homologimit të veturave.

Secili qytetar që ka importuar veturë nga ndonjë vend tjetër në Kosovë është dashur të paguajë hiç më pak se 125 euro në emër të homologimit, proces ky i vlerësuar si i panevojshëm edhe nga përfaqësuesit e Bashkimit Evropian në Kosovë.

Homologimi ishte ndër çështjet më të diskutuara vitin e shkuar në Kosovë pasi “EuroLab” kishte monopol për homologim në Kosovë.