Të gjitha shkollat do të hapen të hënën në Kosovë, me përjashtim të një numri të vogël që janë vonuar me përgatitje infrastrukturore. Kështu ka bërë të ditur ministri i Arsimit, Ramë Likaj, në një konferencë të përbashkët me ministrin e Shëndetësisë, drejtorin e IKSHP-së, kryetarin e Sindikatës së Arsimit e përfaqësues të Këshillit të Prindërve.
Likaj ka deklaruar se janë bërë të gjitha përgatitjet për fillimin e vitit shkollor. Ai tha se të shtunën dhe të dielën MASH-i ua ka shpërndarë shkollave gjysmë milioni maska teksa ka thënë se përdorimi i tyre është obligim.
E ministri i Shëndetësisë, Armend Zemaj, ka kërkuar bashkëpunim prindër-nxënës-mësimdhënës e institucione për ta menaxhuar sa më mirë situatën me Covid-19.
Ndërkaq, drejtori i IKSHP-së, Naser Ramadani është zotuar se çdo rast që paraqitet në shkolla do të trajtohet me prioritet nga Instituti.
Në këtë konferencë kanë qenë prezentë edhe kryetari i SBASHK-ut, Rrahman Jasharaj, e nënkryetarja e Këshillit të Prindërve, Hadije Zuqaku, të cilët kanë uruar nxënësit për fillimin e vitit shkollor.
Nxënësit e mësimdhënësit i ka uruar edhe presidenti Hashim Thaçi, i cili përmes një postimi në Facebook ka kërkuar që t’i respektojnë masat dhe të ruajnë shëndetin.
Sipas vendimit që e kanë marrë MASH-i dhe komunat, mësimi do të nisë në dy faza. Më 14 shtator fillojnë mësimin klasat 0 deri në 6 dhe klasa e 10-të. Për klasat 4 dhe 5 u është lënë drejtorive komunale të vendosin se në çfarë forme do ta zhvillojnë mësimin, në shkolla apo nga distanca.
Kurse faza e dytë e mësimit do të nisë më 21 shtator. Në këtë fazë përfshihen klasat 7,8 e 9 të arsimit të mesëm të ulët dhe klasat 11 e 12 të arsimit të mesëm të lartë.
© KOHA. Të gjitha të drejtat janë të rezervuara.
