KFOR-i amerikan stërvitje 15-ditëshe në Maqedoninë e Veriut
Prej sot deri më 15 shtator në poligonin ushtarak Krivollak në periferi të Shkupit do të zhvillohen stërvitje ushtarake të pjesëtarëve të forcave të armatosura të SHBA-ve, që janë në kuadër të misionit të KFOR-it në Kosovë, përcjell INA.
Sipas njoftimit të Shtabit të Përgjithshëm të Armatës së Maqedonisë së Veriut, stërvitja do të zhvillohet në bashkëpunim me ushtrinë vendore ARM si dhe pjesëtarët e KFOR-it polak.
Pjesëmarrës janë pjesëtarët e njësiteve të këmbësorisë amerikane, të cilët do të kryejnë lloje të ndryshme të gjuajtjeve, por edhe aktivitete tjera taktike ushtarake.
Ushtria amerikane tanimë tre vite me radhë është nikoqire e kësaj baze ushtarake për stërvitje.
Vitin e ardhshëm planifikohet stërvitja më e madhe ushtarake deri më tani në Maqedoninë e Veriut e emërtuar “Goditja vendimtare 2021”, ku do të marrin pjesë mbi 4 mijë pjesëtarë të forcave të këmbësorisë të forcave të armatosura të SHBA-ve për Evropë, ARM si dhe ushtri nga vendet e tjera anëtare të NATO-s.
