Ish-anëtarët e Komisionit për Shënjimin e Kufirit, Florim Isufi e Shpejtim Bulliqi, kanë shpjeguar përmes një analize se xhandarmëria serbe është futur në territorin e Kosovës rreth 300 metra vijë ajrore nga pika më e afërt e kufirit.
Të premten, forcat serbe u panë në brendi të territorit të Kosovës, duke zgjuar reagime të shumta. Në anën tjetër, KFOR-i në një reagim ka thënë se kjo ishte në kuadër të patrullimeve të përbashkëta rutinore. Kjo forcë kishte thënë se vija kufitare mes Kosovës e Serbisë “nuk është shënjuar qartë apo e përcaktuar nga elemente të terrenit natyror dhe të identifikueshëm, siç janë lumenjtë ose vargmalet, por është shënuar vetëm në harta” e se mund të ketë lëvizje “me një shkallë përshtatjeje të imponuar nga terreni”.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoNë anën tjetër, Isufi përmes një postimi të përbashkët me Bulliqin në Facebook, ka thënë se mund të konstatohet se xhandarmëria serbe u fut për rreth 300 metra vijë ajrore nga pika më e afërt e kufirit, ndërsa nëpër rrugë, sipas tij, edhe më gjatë.
“Pas publikimit të disa videove në mediat kosovare, dhe pas detektimit të pozicionit gjeografik, mund të vërtetohet distanca e futjes së xhandarmërisë serbe brenda territorit tonë. Bazuar në analizën e realizuar nga imazhet satelitore dhe krahasimin i tyre me videot dhe foto të bëra në vendin e ngjarjes, mund të konstatohet e xhandarmeria serbe është futur në territorin e Kosovës rreth 300 metra vijë ajrore nga pika më e afërt e kufirit, ndërsa nëpër rrugë edhe më gjatë. Rreth 700 metra nga vija kufitare në drejtim të fshatit Muhovc. Pozicioni i realizuar nga xhirimet e kamerës së sigurisë së restorantit Oksigjen, janë 4400 metra larg nga pika e vëzhgimit të Policisë së Kosovës e cila është e pozicionuar kohë pas kohë në rrugën Rogoqicë-Karaçevë”, ka shkruar ai në Facebook.
Sipas tij, veprimi i forcave serbe “s’mund të cilësohet si gabim”.
“...sepse morfologjia e terrenit është shumë e theksuar dhe tepër lehtë e identifikuar për detektim të vijës kufitare. Pra edhe njohësi më i dobët i hartave mund të orientohet në këtë pjesë të territorit, e mos të dyshohet për një trupë profesionale. Faktet hartografike dhe vizuale janë të sakta, e bazuar në to, Qeveria e Kosovës duhet të reagoj ashpër për futjen e personave të armatosur në thellësi kaq të madhe të territorit tonë, sidomos pa paralajmërim dhe leje paraprake. Hartat dhe fotot tregojnë faktet nga terreni”, ka shkruar ai.
