1 perditesime
17:40

Osmani insiston për platformë të përcaktuar qartë për dialog me Serbinë

Kryetarja e Kuvendit të Kosovës, Vjosa Osmani, ka thënë se duhet platformë e qartë për dialogun me Serbinë.

Ajo në një takim me ambasadorin e Italisë në vend, Nicola Orlando, të hënën pasdite, ka vlerësuar rolin e Italisë në proceset që po kalon Kosova.

“Dialogu është i rëndësishëm, por ne kërkojmë platformë të përcaktuar qartë”, ka thënë Osmani.

Duke potencuar rolin e Kuvendit përgjatë procesit të dialogut, ajo ka thënë se për të gjitha çështjet që trajtohen duhet të raportohet në organin ligjvënës.

Sipas njoftimit, ambasadori Orlando ka thënë se Italia mbështet dialogun e ndërmjetësuar nga BE-ja.

17:10

Osmani: S’pranojmë asnjë version dialogu ku negociohet territori i Kosovës

Kryetarja e Kuvendit, Vjosa Osmani, ka thënë se nuk do të pranohet asnjë version dialogu, me të cilin negociohet tërësia territoriale e Kosovës, bëhet e ditur përmes një komunikate për media.

Osmani sot është takuar me shefen e Zyrës së BE-së, Nataliya Apostolova, me të cilën u bisedua për zhvillimet e fundit në vend, thuhet në komunikatë.

Tutje thuhet se Osmani dhe Apostolova folën edhe për rolin e Kuvendit në procesin e dialogut si dhe agjendën e Kuvendit në muajt në vazhdim.

“Procesi i dialogut me Serbinë duhet të jetë i kujdesshëm. Ne nuk pranojmë asnjë version dialogu, me të cilin negociohet tërësia territoriale e Kosovës. Kuvendi do të ketë rol të rreptë mbikëqyrës dhe do të insistojmë maksimalisht në rritjen e transparencës për procesin e dialogut. Gjithashtu do të kërkojmë raportim në Kuvend për secilën fazë të negociatave”, ka thënë Osmani. ​