LDK-ja thirr për nesër mbledhjen e Kryesisë ku do të vendoset përbërja e Qeverisë Hoti

Lidhja Demokratike e Kosovës ka njoftuar se nesër do të mbajë mbledhjen e Kryesisë, në të cilën do të bëhet e ditur përbërja e Qeverisë Hoti.

Kjo mbledhje e Kryesisë ishte paralajmëruar për sot, por u shty në pritje të aktgjykimit të plotë të Gjykatës Kushtetuese për dekretin e presidentit Hashim Thaçi, ka njoftuar LDK-ja përmes një njoftimi në Facebook.

Sot, Kushtetuesja e ka shpallur aktgjykimin e plotë.

Lidhja Demokratike e Kosovës ka njoftuar se është në pritje të aktgjykimit të plotë të Gjykatës Kushtetuese për çështjen e mandatarit.

Shefi i Grupit Parlamentar të LDK-së, Arben Gashi, ka thënë se në mungesë të vendimit të plotë, është pezulluar edhe mbledhja e Kryesisë së partisë.

Ai i ka thënë KOHËS se sapo të pranojnë vendimin do të procedojnë tutje me hapat e ardhshëm për formimin e Qeverisë me kryeministër Avdulla Hotin.

“Ne ende nuk kemi marrë informacione nga Gjykata Kushtetuese se kur do të vjen vendimi i plotë, sapo ta marrim atëherë do të procedojmë tutje”, ka thënë ai.

KOHA ka provuar të marrë përgjigje nga Gjykata Kushtetuese se kur do t’iu dërgohet palëve vendimi i plotë, por të njëjtit nuk janë përgjigjur.

Kushtetuesja ditë më parë vendosi në favor të dekretit të presidentit Hashim Thaçi për të mandatuar Hotin për kryeministër.

VV-ja si parti fituese insiston se vetëm asaj i takon formimi i Qeverisë.

Qeveria e udhëhequr nga Albin Kurti u rrëzua më 25 mars me mocion mosbesimi të iniciuar nga LDK-ja, që ishte edhe partnere e koalicionit.

© KOHA. Të gjitha të drejtat janë të rezervuara.