2 perditesime
20:12

Vitia konfirmon se numri i serbëve të infektuar në veri, së shpejti futet në listën e IKSHPK-së

Arben Vitia, ministër në detyrë i Ministrisë së Shëndetësisë, theksoi se me autoritetet lokale në veri të Mitrovicës, janë vazhdimisht në koordinim.

Ka bërë thirrje të lihen anash dallimet politike dhe se sipas tij, MSH-ja dhe IKSHPK-ja, në vazhdimësi do të punojnë për qytetarët në tërë Kosovën.

“MSH-ja ka qenë në koordinim me autoritetet lokale në komunat veriore për çdo veprim, dhe jemi ende në koordinim me to, vendimi për karantimin të Mitrovicës së Veriut dhe Zveçanit, është marrë nga MSH-ja me koordinimin të plotë me autoritetet lokale. Unë marrë përgjegjësi nëse nuk është kështu. Të gjitha dallimet politike të lihen anash, primare është shëndeti i qytetarëve tanë, pa dallim do të ofrojmë ndihmën tonë në çdo cep të vendit”, theksoi Vitia, raporton KOHA.

Vitia tha se në koordinim me autoritetet lokale, 2 ekipe nga IKSHP-ja kanë shkuar në ato pjesë të veriut dhe kanë bërë mbi 90 mostra dhe dolën 3 pozitivë.

“Një pjesë e mostrave që janë realizuar më herët dhe që nuk janë realizuar në Prishtinë nuk janë regjistruar akoma por jemi në koordinim me autoritetet lokale të cilat do të dërgojnë numrin e saktë të personave të infektuar e më pas do të futen e update-ohen në të dhënat e reja që do të nxjerrë IKSHPK-ja”, tha Vitia.

Ndërsa, drejtori i Policisë Rashit Qalaj tha se të gjithë pjesëtarët serbë që kanë hyrë në Kosovë prej kur ka nisur përhapja e pandemisë Covid-19, është bërë me dijeni dhe me leje nga autoritetet kosovare.

“Me leje kanë hyrë në Kosovë shumë pjesëtarë serbë, e mjekë për t’i kontrolluar qytetarët serbë”, tha ai.

Ndërkohë, ministri në detyrë Vitia shtoi se “Vendimet e MSH sikur për komunat tjera, i ka marrë me rekomandim të IKSHPK-së”.

“Janë profesionistët që duhet të flasin, t’i lëmë ta bëjnë punën e tyre. Çdo vendim edhe në të ardhmen që do ta merr MSH-ja, do ta bëjë në koordinimin me këta profesionistë”, përfundoi ai.

20:08

Ramadani: Tri javët e ardhshme janë kritike, qytetarët t’i shmangin daljet

Drejtori i Institutit Kombëtar të Shëndetësisë Publike, gjatë konferencës së përbashkët me Ministrin e Shëndetësisë, Arben Vitia dhe drejtorin e Policisë, Rashit Qalaj, të shtunën mbrëma e ka bërë një paraqitje të shkurtër të situatës epidemiologjike në Kosovë.

Ramadani ka thënë mbrëmë është thyer rekordi i Laboratorit të Mikrobiologjisë, teksa janë testuar 243 raste, prej të cilave 9 dolën pozitive.

“Duke e pasur këtë situatë, tashmë një muaj e tepër, me të cilën po ballafaqohemi intensitivisht duke diagnositifikuar dhe duke gjurmuar në terren të gjitha rastet që kanë të bëjnë me COVID-19, ne kemi arritur në këtë pikë me 135 raste pozitive, që i ka tejkaluar parashikimet tona, pasi që kemi menduar se do të kemi më shumë raste”, ka thënë ai.

“Por, nuk ka vend për kënaqësi, derisa ta largojmë virusin nga trevat tona”, ka shtuar ai.

Ramadani ndërkaq ka thënë se do të vazhdojë bashkëpunimi i plotë mes autoriteteve. Ai në të njëjtën kohë u ka bërë sërish apel qytetarëve, që të mos dalin, duke kërkuar që ata t’i përmbahen deri në fund të prillit udhëzimeve për të qëndruar në shtëpi dhe për të dalur vetëm në rast nevojë”.

“Janë tri javë kritike, qytetarët gjatë këtyre të mos tubohen dhe të qëndrojnë në shtëpi”, ka thënë ai.

19:59

Vitia: Jemi në koordinim me kryetarët e komunave të veriut që janë në karantinim

Ministri në detyrë i Shëndetësisë Arben Vitia, në një konferencë të përbashkët me drejtorin e Policisë Rashit Qalajn dhe drejtorin e IKSHPK-së, Naser Ramadanin ka folur për situatën e krijuar në veri të Mitrovicës e shifrave me koronavirusin Covid-19.

Vitia tha se në IKSHPK, dje deri pasdite janë testuar 443 raste ku pozitivë kanë rezultuar 9.

“Janë shëruar 6 dhe lajmi i mirë është se numri i të shëruarve po rritet. 1743 raste janë testuar gjithsej dhe 135 janë infektuar, 1 i vdekur dhe 16 të shëruar në përgjithësi. Në mesin e të testuarve që kanë dalë pozitivë janë edhe 3 nga veriu”, tha Vitia, përcjell Koha.

IKSHPK, thotë Vitia, do të vazhdojë të testojë njerëzit pandërprerë.

Sipas Vitisë, do të bëhet çmos për ta parandaluar përhapjen e Covid-19.

“Krantinimi i 2 komunave në veri u bë me dijeninë tonë. Janë marrë masat sipas protokollit. Ne kemi vepruar nga udhëzimet që vijnë nga OBSH-ja. Shpresojmë që bashkë do t’ia dalim. Me kryetarët e komunave në Mitrovicën e Veriut e Zveçan do të koordinohemi në vazhdimësi. Jemi në dijeni për deklaratat e shumta sot, edhe të karakterit politik, por po kërkoj që sot të jemi solidarë. Pandemia është kërcënim për gjithë njerëzimin, kujdes ju lutem nga komunikatat e pasaktësuara. I ftoj qytetarët të ndjekin këshillat tona, të jenë të sigurt që zyrtarët policorë, bashkë me infermierë e mjekë po japin maksimumin. Ju lutem t’i shmangni vizitat familjare. Ruani shëndetin tuaj e të familjarëve. Mendoni dy herë para se të dilni nga banesa e shtëpia. Çdo dalje bart rrezikshmëri të lartë, ky muaj do të saktësojë gjithçka. Vetëm bashkë mund t’ia dalim”, përfundoi Vitia.