18:15

Përfundon takimi i Qeverisë në Prevallë, harmonizohet programi qeverisës

Pas gati tetë orësh takim të Qeverisë së Kosovës në Prevallë, ai ka përfunduar.

Mësohet se qeveria ka harmonizuar programin e vet qeverisës, raporton Koha. 

Zv/kryeministri i dytë, Haki Abazi, tha para mediave se salla ku janë mbledhur sot ka kushtuar 150 euro, dhe ishte një drekë e thjeshtë. Sipas tij, gjithçka do të bëhet publike shumë shpejt.

Edhe kryeministri Albin Kurti, kumtoi se është harmonizuar programi qeverisës, derisa njoftoi se tash është duke shkuar në qeveri.

 

15:16

Kurti: Do të kemi Qeveri që planifikon para se të vendosë

Kryeministri i Kosovës, Albin Kurti, ka thënë se sot në mbledhjen gjithëditore u prezantua Drafti i Programit Qeverisës.

Ai tutje ka shtuar se gjithashtu po paraqiten edhe prioritetet afatshkurtra e afatmesme si dhe masat legjislative e politike të ministrive përkatëse.

Ai në fjalën e tij drejtuar kabinetit qeveritar ka paraqitur synimet kryesore që Qeveria synon t’i arrijë gjatë mandatit qeverisës. I pari i Qeverisë tutje ka shtuar se sfidat në qeverisje janë të mëdha, por se ajo çfarë nuk do të duhej të bënin është ta sfidojnë njëri-tjetrin.

Kurti ka thënë se synim kanë anëtarësimin në NATO, duke shtuar se do të investojnë në mbrojtje që të rrisin kapacitetet e FSK-së.

Ai tutje ka shtuar se shërbimi i jashtëm duhet të rishikohet në mënyrë që të garantojë përfaqësim të denjë për vendin.

Kurti ka thënë se anëtarësimi në BE mbetet prioritet kurse dialogu me Serbinë të jetë mirë i përgatitur e parimor, për të zgjidhur çështjet e pazgjidhura.

“Do të kemi një qeveri e cila planifikon dhe analizon para se të ekzekutojë vendime e të realizojë punime, e cila promovon sundimin e ligjit, që redukton shpenzimet financiare, përmirëson menaxhimin e financave publike dhe menaxhimin e ndërmarrjeve publike, që modernizon administratën publike dhe rritë transparencën llogaridhënien”, ka thënë ai.

Postimi i plotë i Kurtit në Facebook:

Në mbledhjen e sotme gjithëditore që po mbahet në hotel "Sharr" në Prevallë të Prizrenit, u prezantua Drafti i Programit Qeverisës për të cilin diskutoi secili ministër. Tash po vazhdojmë me paraqitjen e prioriteteve afatshkurtëra e afatmesme, si dhe të veprimtarive e masave legjislative e politike të ministrive përkatëse. Në fund do ta hartojmë kornizën e planit të punës dhe organizimin e veprimit ndërministror sipas prioriteteve dhe sektorëve. Në vijim është teksti i fjalës sime hyrëse:

Mirëmëngjes të nderuar ministra dhe zëvendës kryeministra,

Shpresoj se keni fjetur mirë të gjithë.

Ditët e orarin e punës i kemi zgjatur por si këmbim ju ftoj të shijoni bukuritë e Sharrit e sidomos ajrin të cili do të na bëjë mirë këtë ditë.

Ende nuk janë bërë një muaj qeverisje, por janë bërë shumë punë.

Kemi filluar me çkapjen e shtetit nga shpërdorimi duke përmirësuar bordet e ndërmarrjeve publike në të cilat ka pasur keqpërdorime të parasë publike, por edhe të keqmenaxhimit duke shkaktuar humbje.

Kemi reduktuar pushtetin dhe kemi ndalë shpenzimet që të kuptojmë se ku qëndrojmë, çka po shpenzojmë dhe, më e rëndësishmja, për çka po shpenzojmë.

Unë jam për të reduktuar e kursyer shpenzimet e panevojshme që nuk sjellin as rritje të mirëqenies, e as nuk krijojnë vende të reja të punës, por jam për të rritur shpenzimet në investime të cilat janë mirë të planifikuara e të studiuara dhe që krijojnë vende të reja të punës në sektorë të qëndrueshëm.

Këtë do ta bëjmë dhe këtë duhet ta bëjmë.

Tashmë kemi edhe një draft të programit qeverisës i cili ka 41 faqe e që derivon nga marrëveshja jonë e koalicionit.

Ky program qeverisës pasqyron orientimet e përgjithshme të qeverisë, qasjen dhe parimet, prioritetet dhe iniciativat si dhe vendimet që do të merren për të përmirësuar gjendjen në vend në të gjitha fushat e përgjegjësisë.

Temat kryesore janë:

1. Qeverisja e mirë dhe sundimi i ligjit,
2. Zhvillimi ekonomik,
3. Arsimi dhe shkenca,
4. Shëndetësia,
5. Politikat sociale,
6. Infrastruktura,
7. Mjedisi, energjia dhe minierat,
8. Kultura, rinia dhe sporti,
9. Mbrojtja dhe siguria, si dhe
10. Politika e jashtme, integrimi dhe mërgata.

Tashmë kemi folur shumë për secilën temë dhe besoj se e dimë përmendësh se çka do të bëhet, por mirë është të rikujtojmë.

Do të kemi një qeveri e cila planifikon dhe analizon para se të ekzekutojë vendime e të realizojë punime, e cila promovon sundimin e ligjit, që redukton shpenzimet financiare, përmirëson menaxhimin e financave publike dhe menaxhimin e ndërmarrjeve publike, që modernizon administratën publike dhe rritë transparencën llogaridhënien.

• Në prokurim publik do të ndërmarrim reforma të cilat arrijnë vlerën për para duke synuar kriterin: ekonomikisht më të favorshëm. Do të rrisim transparencën duke hapur përfituesit përfundimtar dhe duke hapur thesarin si dhe do të ngrisim kapacitetet për të monitoruar çdo parregullsi në proces për të parandaluar favorizimet e kurdisjet e tenderëve e sidomos menaxhimin e kontratave.

• Në administratë publike do të vazhdojmë reformat që profesionalizmin dhe efektshmërinë i kanë princip.

• Në ndërmarrje publike do të vazhdojmë bashkëpunimin me Mbretërinë e Bashkuar për të siguruar një proces fer, të drejtë dhe profesional të zgjedhjes së anëtarëve të bordeve.

• Do të avancojmë shërbimet elektronike dhe digjitale sepse sa më pak ndërveprim që kanë qytetarët dhe bizneset me zyrtarë publikë, aq më shumë parandalojmë keqqeverisjen dhe korrupsionin.

• Në qeverisje lokale do të synojmë që ajo të jetë sa më afër qytetarit e sa më larg korrupsionit. Qeveria do të ndajë grantin e katërt qeveritar për komunat, sipas parimit të meritokracisë, të bazuar në performancë.

• Do të luftojmë krimin e organizuar dhe korrupsionin si dhe do të bëjmë rishikimin funksional të drejtësisë ku tashmë veçse kemi bërë hapat e parë.

• Do të përgatisim ligjin për krimet e luftës, gjenocidin dhe krimet kundër njerëzimit.

• Do të avancojmë të drejtat e njeriut dhe sigurinë në komunitet si dhe do të finalizojmë miratimin e Kodit Civil.

• Do të themelojmë gjykatën komerciale dhe do të punohet për verifikimin dhe regjistrimin e saktë të pronave.

• Do të heqim monopolet dhe do të luftojmë evazionin fiskal në biznes dhe do të ofrojmë një mjedis të barabartë.

• Do të themelojmë Fondin Zhvillimor dhe do të rrisim qasjen në financa për të përkrahur ndërmarrësit.

• Do të transformojmë Agjencinë Kosovare të Privatizimit dhe do të krijojmë Fondin Sovran.

• Do të promovojmë politikat e turizmit duke mbështetur parqet nacionale, sikurse Malet e Sharrit.

• Do të përmirësojmë të drejtat e punëtorëve për punë dhe pagë të dinjitetshme duke fuqizuar sindikatat dhe duke rritur sigurinë shëndetin në punë.

• Do të rishikojmë politikat e sektorit të bujqësisë për të rritur prodhimtarinë dhe do të promovojmë ato duke ristrukturuar e përmirësuar punën e KIESA-s.

• Do të rrisim bazën prodhuese që ta zbusim deficitin e madh tregtar duke rritur eksportet e zëvendësuar importet.

• Politikat tona tregtare do të jenë që tregu të liberalizohet, por edhe do të mbrohet nga konkurrenca jolojale përmes parimit të reciprocitetit dhe masave tregtare.

• Arsimi dhe shkenca janë prioritet jo vetëm për të zvogëluar hendekun mes tregut dhe edukimit por edhe për të investuar në kapitalin njerëzor si pasuri kombëtare. Do të investojmë në edukimin e hershëm dhe në rritjen e cilësisë në shkolla të mesme e profesionale.

• Në shëndetësi do të punojmë për përmirësimin e shërbimeve shëndetësore dhe do të funksionalizojmë fondin e shërbimeve shëndetësore.

• Do të fillohet me një reformë të politikave sociale e cila synon shpërndarjen e mirëqenies dhe përmirësimin e gjendjes së familjeve me fëmijë.

• Mjedisi do të mbrohet. Ndotja kryesore vjen nga termocentralet dhe do të investohet në filtra, por do të punohet në rritjen e nxitjen e transportit publik për të reduktuar ndotjen nga makinat, do të punohet në pyllëzim dhe në mbrojtjen e ujerave si dhe në eliminimin e deponive të hapura.

• Investimet në infrastrukturë do të fokusohen në rrjetet e kanalizimeve, ujësjellësve, trotuareve dhe ndriçimeve për të rritur sigurinë, pastërtinë, dhe mobilitetin, por edhe në zgjerimin e rrugëve të cilat lidhin komunitetet.

• Do të punojmë në krijimin e një zone të përbashkët energjetike Kosovë – Shqipëri. Do të liberalizojmë dhe diversifikojmë burimet e energjisë si dhe do të ndalojmë humbjet e do të rrisim e stabilizojmë prodhimin.

• Do të investojmë në miniera dhe në asete tjera strategjike përmes Fondit Sovran.

• Do të investojmë në sport dhe do të promovojmë kulturën duke investuar në infrastrukturë dhe duke ofruar mbështetje.

• Synimi ynë është anëtarësimi në NATO prandaj edhe do të investojmë në mbrojtje që të rrisim kapacitetet e FSK-së.

• Shërbimi i jashtëm duhet të rishikohet në mënyrë që të garantojë përfaqësim të denjë për republikën.

• Njohjet dhe anëtarësimet në organizata ndërkombëtare janë prioritet për shtetin tonë.

• Anëtarësimi në BE mbetet prioritet kurse dialogu me Serbinë të jetë mirë i përgatitur e parimor, për të zgjidhur çështjet e pazgjidhura.

• Mërgata do të jetë edhe brenda qeverisë. Barrierat e votimit jashtë dhe të mësimit në gjuhën shqipe do të lehtësohen si dhe do të rritet komunikimi e bashkëveprimi.

Këto janë temat e çështjet në të cilat këtë vit qeveria duhet të punojë që të japë rezultatet e para.

Sfidat janë të shumta sepse problemet që përballemi janë të mëdha, por ne nuk do të ikim nga problemet e as t'i evitojmë ato.

Ajo që nuk do të duhej të bënim është që të sfidojmë njëri-tjetrin.

Kërkohet bashkëpunim dhe përkrahje sepse prioritet kemi qytetarin, mirëqenia e tij është matësi i progresit dhe i suksesit tonë.

Natyrisht është përgjegjësi e jona si qeveri që të ofrojmë lidership. Vendi ynë ka nevojë për hapje të mundësive për lëvizje të lirë, për investime e për tregti, këtë e kuptojmë dhe për këtë punojmë.

Por, para se ky të jetë synim e motiv duhet të jetë përgjegjësi. Ne jemi pasqyra ku qytetarët shohin vetveten në shtetin e tyre. Nuk është vetëm cilësia e vendimeve që marrim por edhe mënyra se si ne e ushtrojmë funksionin ajo që tregon për modelin tonë qeverisës. Të punojmë me përulësi e thjeshtësi, por me shumë profesionalizëm e përkushtim.

Është më mirë të marrim me shumë seriozitet përgjegjësitë që kemi se sa të shqetësohemi se si dukemi.

Udhëtimet jashtë e brenda vendit janë në funksion të arritjes së qëllimeve programore e objektivave shtetrore e jo në funksion të vetvetes.

Jam i bindur që secili nga ju tashmë keni entuziazmin për të arritur qëllimet në këtë program sepse entuziazmi juaj buron nga qytetarët tanë dhe devocioni juaj. Në çdo intervistë ata janë të mbushur me shpresë se do të bëhet mirë më në fund.

Mundësinë e kemi, vullnetin dhe kapacitetin gjithashtu, prandaj le të mos ngatërrohemi me njëri-tjetrin, por të shikojmë kah vetja.

Përvojën e dijen që keni, mundësia që na është dhënë, le të përdoren për të mirë. Ky është shansi unik që secili nga ne të jap maksimumin.

Zyra ime është e hapur çdo ditë për secilin. Në punë dhe ide të mira mua më keni prapa në secilin hap edhe me buxhet edhe me përkrahje.

Sfida ka plot, por po ashtu jemi me plot shpresë.

Fillimin e kemi të mbarë, prandaj le të vazhdojmë me punë dhe angazhim.

Në këto 100 ditë punë, le të bëjmë gara për arritjen e objektivave e jo me njëri-tjetrin. Ne jemi anëtarë të të njëjtit ekip. Neve na bën ata që jemi ekipi, dhe çdonjëri nga ne e përbën ekipin. Ekipi na e jep kuptimin, ne ia japim përmbajtjen.

Unë dua t'ju përgëzoj për punën e mirë të deritashme që keni bërë secili prej jush, zëvendës kryeministra e ministra dhe të gjitha ekipet e secilit prej jush këtu.

Ju falemnderit.

12:08

Hoti thotë se sot finalizohet programi qeverisës VV-LDK

Zëvendëskryeministri Avdullah Hoti ka thënë se sot po finalizohet programi qeverisës i cili është arritur mes dy partnerëve të koalicionit.

Ai tutje ka folur edhe për takimin mes kryeministrit Albin Kurti dhe kryetarit të LDK-së, Isa Mustafa të zhvilluar mbrëmë pas hapit për heqjen e pjesshme të taksës 100 për qind.

Hoti për KTV-në ka thënë se me VV-në kanë dallime rreth kësaj çështje, por se janë duke punuar që t’i përafrojnë qëndrimet.

“Janë takuar dy kryetarët e partive dhe është diskutuar për tejkalimin e situatës, është kërkesë e partnerëve të heqim taksën, ndërkaq partnerët na japin premtime që do të angazhohen në ndaljen e fushatës për çnjohje. Kemi disa diferenca brenda koalicionit qeverisës dhe do të takohemi përsëri që t’i përafrojmë qëndrimet”, ka thënë ai.

Ndërkaq zëvendëskryeministri Haki Abazi ka thënë se sot në mbledhjen e Qeverisë nuk është duke u diskutuar asgjë tjetër përveç programit qeverisës.

Ai ka thënë se deri tash në mbledhje kanë dëgjuar vlerësimet e ministrave se si i kanë gjetur ministritë.

Abazi në një prononcim për media ka thënë se theks i veçantë i kësaj mbledhjeje do të jenë prioritetet e ministrive dhe bashkërendimi i tyre

“Theks i veçantë është që përveç që ministrat të tregojnë për prioritetet e tyre do të shohim edhe pikat e bashkërendimit që duhet të ndodhin mes ministrive që menjëherë të fillojnë me punën e koordinimit dhe çfarëdo ndihme që mund të ketë secila ministri dhe secili ministër. Kemi shumë sfida që jemi duke u ballafaquar por me bashkërendim do të arrihet që plani i punës të jetë i qartë dhe konkret”, ka thënë ai.

 

 

09:52

Nis mbledhja e Qeverisë në Prevallë

Ka nisur mbledhja gjithëditore e Qeverisë së Kosovës e cila po mbahet sot në Prevallë.

Kjo mbledhje është thirrur për të harmonizuar programin qeverisës.

Të pranishëm janë anëtarët e kabinetit qeveritar dhe stafi i zyrës së kryeministrit.

 

 

09:04

Qeveria mblidhet në Prevallë për të harmonizuar programin qeverisës

Qeveria e Kosovës është mbledhur në Prevallë për të harmonizuar programin qeverisës.

Kjo është mbledhja e parë e ekzekutivit kosovar e këtij lloji, raporton KTV.

Në Prevallë tashmë janë parë kryeministri Albin Kurti, zëvendëskryeministrat Avdullah Hoti Haki Abazi. Të pranishëm janë edhe disa ministra, ndërsa asnjëri prej tyre s’ka pranuar të flasë për mediat.

Por në një postim në Facebook, zëvendëskryeministri i parë Avdullah Hoti, ka thënë se sot do të diskutohet mbi programin qeverisës të koalicionit qeveritar, në të cilin reflektohet marrëveshja VV-LDK.

“Sot, në takim pune në Sharr me gjithë kabinetin qeveritar, diskutojmë Programin Qeverisës 2020-2023. Në këtë program reflektohet plotësisht marrëveshja e koalicionit, ku janë të specifikuar masat që do të ndërmarrim për të rritur punësimin, për kujdes social gjithëpërfshirës, për arsim e shëndetësi cilësore, rend e ligj për të gjithë, mbështetje për bujqësinë, diplomaci të fortë, kujdes për mërgatën tonë e çështje tjera”, ka shkruar ai.

Kjo është mbledhja e parë gjithëditore e Qeverisë Kurti, e në të pritet të finalizohet programi qeverisës.

Është bërë pothuajse një muaj që kur u formua Qeveria Kurti.

Ende nuk dihet nëse ka filluar të mbahet mbledhja, pasi që gazetarët nuk janë lejuar të hyjnë në hapësirën ku është mbledhur kabineti qeveritar.