Sistemi i drejtësisë në mbrojtje të fëmijëve nga dhuna fizike e seksuale, ka dështuar deri më tash.
Ky është vlerësimi i përgjithshëm i Koalicionit të Organizatave Joqeveritare për Mbrojtjen e Fëmijëve në Kosovë (KOMF), njofton KP-ja.
KOMF-i, nëpërmjet një konferencë të mbajtur të martën, ka shprehur shqetësimet lidhur me rastet ku fëmijët janë viktima të abuzimit dhe të dhunës seksuale. Ka përmendur edhe rastin e një fëmije në Fushë-Kosovë, që humbi jetën nga dhuna e vazhdueshme seksuale. Për këtë, KOMF-i ka kërkuar nga ministrja e Drejtësisë, Albulena Haxhiu, ministri i Punëve të Brendshme, Agim Veliu, kryeprokurori i shtetit, Aleksander Lumezi dhe kryetarët e Fushë-Kosovës e Prishtinës të veprojnë për rastin.
“Si koalicion jemi të shokuar që raste të tilla, siç është rasti i tragjik i fëmijës nga Fushë-Kosova, i cili përfundoi me vrasjen makabre të tij, nuk ka ndikuar aspak në reflektim as në mobilizim e ngritje të nivelit të përgjegjësisë të gjithë sistemit të mbrojtjes së fëmijës, e sidomos Prokurorisë”, tha Donjeta Kelmendi nga ky koalicion.
Ky grup organizatash joqeveritare ka kërkuar “përgjegjësi penale nga të gjitha palët e sistemit mbrojtës, që dështuan të ushtrojnë obligimin ligjor të mbrojtjes së fëmijës nga Fushë-Kosova”.
© KOHA. Të gjitha të drejtat janë të rezervuara.
