Ahmeti thotë se platforma s’i pëlqeu Mogherinit, “i thash ftesat t’i dërgohen Kosovës pa emër”

Ahmeti thotë se platforma s’i pëlqeu Mogherinit, “i thash ftesat t’i dërgohen Kosovës pa emër”

14 May 2019 00:24

Shpend Ahmeti, kryesues i Ekipit Negociator të Kosovës ka thënë se Përfaqësueses së Lartë të Bashkimit Evropian, Federica Mogherini, nuk i ka pëlqyer shumë platforma e Kosovës për dialog.

Ai ka thënë se në Bruksel kur është dorëzuar platforma kanë menduar se po mbyllen rrugët për dialogun.

“Jemi takuar njëherë me Mogherinin e ekipin ndërmjetësues në Bruksel. Ideja ishte për temat që duhet të fliten në dialog. Ata s’reagojnë, thonë në rregull. Ne kemi kërkuar pagesën e reparacioneve për krimet e luftës, kërkesën për pensionet, të ndahen asetet si borxhet dhe kërkimfalje dhe reparacionet për viktimat e dhunës seksuale. Kemi dërguar personalisht platformën. S’kanë qenë të kënaqur me platformën sepse kanë menduar se i kemi mbyllur rrugët për dialog, por u kemi thënë se ky është qëndrimi jonë”, ka deklaruar Ahmeti në Interaktiv të KTV-së.

Ahmeti po ashtu ka thënë se ka kërkuar personalisht nga Mogherini dhe zëdhënësja Maja Kocijançiq që ftesat të vijnë te Ekipi Negociator i Kosovës pa caktuar kush duhet të shkojë në dialog. Ai ka thënë se do të takohen me këdo që e cakton Serbia.

“I takon Serbisë të caktojë ekipin negociator. Do të takojmë Vuçiqin nëse ai vjen. Ftesat vijnë te ekipi shtetëror. Nëse e ftojnë edhe presidentin, ftesa vjen tek ne e ne ia dërgojmë atij ftesën. Ekipi shtetëror sipas ligjit për dialogun, është kryesori për negociatat. Në takimin e parë ua kemi bërë të qartë, ishin të gjithë. U kam thënë personalisht mirë që është Kocijançiq këtu e të mos bëni deklarata se presidentët duhet të vijnë sepse s’u takon të na caktoni kush dialogun. A i konvenon asaj të kenë Thaçin e Vuçiqin sepse kanë histori të takimeve e u duket më lehtë s’është punë e jona”, ka shtuar Ahmeti.


Lexoni edhe: 

Ahmeti sqaron pse tha se nëse ndal ndërtimet ose “do të burgoset ose do të vritet”


Ai ka folur për punësimet në administratën e ekipit që udhëheq. Ka thënë se kanë marrë edhe ekspertë ndërkombëtarë e u duhet edhe administratë. Ka shtuar se kur të nisin negociatat do të ketë të punësuar më shumë sepse “duhet të na ndihmojnë”.

Për dokumentin që kanë kërkuar nga presidenti lidhur me dialogun e mëhershëm deri kur u bë ekipi negociator, Ahmeti ka thënë se “presidenti dorëzoi një dokumentacion shtatëfaqësh me ‘tha ky, tha ai’”.


Lexoni edhe: 

Ahmeti: PSD-së nuk i konvenojnë zgjedhjet, por qeverinë duhet ta rrëzojmë


Ahmeti ka thënë se nga BE-ja i është thënë se s’ka asgjë të vërtetë në raportimet se ka një draft-marrëveshje.

Në fund, ka thënë se më shumë ka gjasa mos të ketë marrëveshje Kosovë – Serbi sesa që të ketë. Kjo sipas tij, për shkak të mospajtimeve mes partnerëve ndërkombëtarë.

© KOHA. Të gjitha të drejtat janë të rezervuara.

Komentet

Shto koment

Të ngjashme