Qeveria e Kosovës të martën ka miratuar Projektligjin që ndalon lojërat e fatit.
Përveç Lotarisë së Kosovës, asnjë kazino, bastore apo ndonjë objekt i kësaj natyre nuk do të mund të operojë më në vend pas miratimit të tij.
Projektligji, i cili në afat prej 30 ditësh pritet të dorëzohet në Kuvendin e Kosovës, parasheh ndalimin e lojërave të fatit për periudhën 10-vjeçare, raporton KTV.
Ndërkohë, një peticion prej më shumë se 11 mijë nënshkrimesh të qytetarëve të Suharekës, të cilët kërkuan shfuqizimin e Ligjit për lojërat e fatit, është dorëzuar në Kuvendin e Kosovës.
Peticioni iu dorëzua kryeparlamentarit Kadri Veseli, nga kryetari i Suharekës, Bali Muharremaj.
Iniciativa për peticion erdhi pas vrasjes që ndodhi në një kazino në Suharekë dhe një tjetër në Lipjan.
Vrasjet e fundit alarmuan qytetarët dhe deputetët e Kuvendit, të cilët javën e kaluar miratuan edhe një rezolutë për pezullimin e të gjitha lojërave të fatit.
