Qendra e paraburgimit në Prishtinë që kushtoi 6.7 milionë euro do të hapet një vit pas përurimit

6.7 milionë euro të tatimpaguesve kosovarë janë dhënë për ndërtimin e këtij objekti që do të duhej të ishte në shërbim të të paraburgosurve gjatë vitit të kaluar.

Por, ata nuk pritet të vendosen aty, para fundit të muajit shkurt.

Aty do të vendosen të paraburgosurit nga Qendra në Pejë, e cila pritet të mbyllet krejtësisht, por në Prishtinë do të ketë edhe të paraburgosur nga qendra të tjera në Kosovë.

Ministri Tahiri ka bërë të ditur se bashkë me Shërbimin Korrektues të Kosovës është duke zbatuar disa masa të Planit Zhvillimor Strategjik, të cilat parashohin përmirësim të sigurisë brenda burgjeve.

Tahiri ka theksuar se në rritjen e kapaciteteve të Shërbimit Korrektues përfshihen edhe burimet njerëzore, ku konkursi për oficerë është në fazën e fundit.

Ky proces ishte zvarritur, për shkak të anulimit të konkursit nga Avokati i Popullit, i cili vlerësoi se Ministria e Drejtësisë kishte shkelur të drejtat e njeriut, duke vënë si kriter moshën e përcaktuar për këtë pozitë.

Qendra e Paraburgimit në Prishtinë ishte përuruar më 5 janar të vitit 2018 nga vetë ministri, Abelard Tahiri.