Shala takoi afaristët nga Turqia, i fton për investime në Kosovë Foto: MTI

Shala takoi afaristët nga Turqia, i fton për investime në Kosovë

31 October 2018 18:58

Ministri i Tregtisë dhe Industrisë, Endrit Shala, ka pritur në takim përfaqësuesit e organizatës së afaristëve “RUMELİSİAD”, nga qyteti i Bursës në Turqi.

Ministri theksoi se është i përkushtuar që t’iu krijojë kushte të mira investitorëve të huaj që të vijnë në Kosovë ta investojnë kapitalin e tyre.

“Përkushtimi im dhe i Qeverisë së Republikës së Kosovës që investitorëve t’iu ofrojmë të gjitha lehtësirat që ata ta kenë sa më të mundshme të bërit biznes në Kosovë. Unë ju falënderoj dhe jemi të kënaqur që bizneset nga Bursa janë të interesuar për të investuar në Kosovë”, tha Shala.

Ministri tregoi që ministria që drejton e ka sponsorizuar Ligjin për Investime Strategjike, që iu krijon lehtësira të jashtëzakonshme investitorëve të huaj.

“Në Kosovë tashmë kemi ligjin për investime strategjike, që ne jemi përgjegjës për implementim e tij. Ky ligj është mundësi e jashtëzakonshme për bizneset që investojnë në Kosovë, sepse ofron lehtësira të pakrahasueshme me vendet e rajonit. Unë jam i gatshëm t’iu qëndroj prapa në çdo hap tuajin që do ta bëni për të investuar në Kosovë. Do t’ua garantoj të gjitha lehtësirat dhe mundësit që investimi juaj në Kosovë të jetë edhe i sigurt, por edhe i suksesshëm”, tha ministri.

Omer Kumova, kryetar i Shoqatës së afaristëve nga Bursa “RUMELİSİAD”, tha se janë të interesuar që të investojnë në Kosovë dhe ta bëjnë lidhjen në mes bizneseve të Turqisë dhe Kosovës.

Kumova tha se janë disa fusha që janë të interesuar për të investuar në Kosovë.

“Deri më tani kemi bërë disa investime në Ballkan, dhe po mendojmë të investojmë sërish dhe kemi disa projekte konkrete”, tha Kumova.

Anëtarët e organizatës “RUMELİSİAD”, janë sipërmarrës në Bursa të Turqisë, që një pjesë e tyre kanë prejardhje nga vendet e Ballkanit. Delegacioni përbëhet nga 11 biznesmen që po shqyrtojnë mundësinë për të investuar në Kosovë në fusha të ndryshme.

© KOHA. Të gjitha të drejtat janë të rezervuara.

Komentet

Shto koment

Të ngjashme