Kandidati i AAK-së premton të sjellë përvojën 37-vjeçare nga Zvicra në Novobërdë
Ajet Avdili ka 37 vjet që jeton e punon në Zvicër dhe këtë përvojë synon ta bartë edhe në Novobërdë, në rast se fiton besimin e qytetarëve.
Kandidati i AAK-së, në emisionin “Zgjedhjet në Kohë – Debati për Novobërdën”, ka thënë se ka hartuar program të detajuar me ekspertë të fushës.
Por baza e programit, siç ka thënë, është përvoja dhe lidhjet që ka me Zvicrën.
“Vijë nga mërgimi, 37 vjet i kam kaluar në Zvicër. Si pikë e parë do të sjelli një kulturë sociale nga atje, pastaj kulturë menaxheriale, nuk mund ta zbatojmë të gjithën në Kosovë, por një pjesë po. Do të sjell edhe një kulturë intelektuale. Nga to që kam marrë nga mërgimi, kësaj here po provoj me i sjell në Kosovë”, ka thënë Avdili.
Ai është ndalur te Kalaja e Novobërdës si një prej atraksioneve më të mëdha për vizitorët në gjithë vendin.
“Kemi rastin e Kalasë së Novobërdës, si ta bëjmë kalanë atraktive për vizitorë edhe nga vendi jonë, por edhe nga jashtë. E bëjmë nëse e hartojmë projektin mirë, nëse dimë më definu dhe dimë me i dhënë rrugëzgjidhje atij projekti dhe për të kërkuar donacione. Nuk bëhet kalaja vetëm me mjete të komunës së Novobërdës, por do të bëhet edhe më investime të Qeverisë dhe me donacione. Këtë mund ta bëjë, kam lidhje atje (Zvicër v.j.), me deputetë e parti, e kam këtë përvojë”, ka deklaruar Avdili.
Ai ka folur edhe për projekte të tjera dhe ka theksuar se organi mbikëqyrës duhet të luajë rol më të madh, kur bëhet fjalë për zbatim të projekteve.
Kandidati i LVV-së për Novobërdën kritikon kundërkandidatët nga Lista Serbe e LDK-ja
Kandidati i Lëvizjes Vetëvendosje për kryetar të Novobërdës, Abdyl Gashi, ka kritikuar ata që kanë udhëhequr me komunën e që janë sërish kandidat për zgjedhjet lokale se po u ikin debateve.
Gashi në emisionin “Zgjedhjet në Kohë – Debati për Novobërdën”, ka thënë se si kryetari i komunës që vjen nga lista Serbe, ashtu edhe nënkryetari që vjen nga LDK-ja, kanë zgjedhur të mos ballafaqohen në prag të zgjedhjeve lokale.
“Do të duhej të ishte në debat edhe kryetari nga Lista Serbe dhe nënkryetari që është kandidat dhe vjen nga LDK-ja, Bajrush Ymeri. Ata kanë zgjidh një metodë, t'u ikin debateve, pasi nuk janë të gatshëm të ballafaqohen për t'i argumentuar problemet apo izolimin që ia kanë bërë komunës së Artanës”, ka thënë Gashi.
Ai ka thënë se ka përgatitur një program të detajuar për këtë komunë dhe se po e prezanton në çdo tubim me banorë.
“Rëndësi të veçantë i kemi dhënë infrastrukturës, pasi që Artana ka një problem të madh me ujin e pijshëm, ku shumica e rrjetit të ujësjellësit në Artan nuk funksionon, por në mandatin tim kjo do të bëhet realitet. Qysh në vitet e para do ta funksionalizojmë. Po ashtu kemi problem me infrastrukturën rrugore. Komuna ka buxhet shumë të vogël, por edhe ai nuk është i ndarë në mënyrë proporcionale”, ka thënë Gashi.
Ai ka premtuar edhe rregullim e zgjerim të disa rrugëve të Novobërdës dhe fshatrave të saj.
Zgjedhjet lokale do të mbahen më 12 tetor.