Dita e tetë e fushatës

Hamza premton investime në Drenicë, rritje të pagave e pensioneve dhe ulje të tatimeve

Rritje të pensioneve për kategoritë e dala nga lufta në nivel prej 50 për qind premtoi kandidati për kryeministër nga Partia Demokratike e Kosovës, Bedri Hamza.

Në ditën e tetë të fushatës për zgjedhjet e parakohshme të 28 dhjetorit, Hamza mbajti tubim në Skenderaj, nga ku premtoi kthimin e investimeve në këtë komunë.

“Nuk do të ketë situatë kur në Drenicë dhe Skenderaj do të ketë investime 0 nga niveli Qendror. Do të kthehen investimet në Drenicë dhe gjithandej Kosovës”, ka theksuar Hamza.

Gjatë shpalosjes së planprogramit qeverisës, në fokus pati veteranët, invalidët e familjet e dëshmorëve.

“Për të gjitha familjet e dëshmorëve, rritje të pensioneve prej 50 për qind. Do të marrin pensione aq sa ka dëshmorë një familje. 50  për qind rritje për invalidë të luftës dhe ju garantoj dhe siguroj trajtim shëndetësor sa herë që kanë nevojë brenda dhe jashtë institucioneve shëndetësore, pa qenë barrë për invalidët e luftës. Ata dhanë gjithçka për Kosovën. Ata dhanë edhe gjymtyrët dhe ne do t’iu qëndrojmë mbrapa. 50 për qind rritje për veteranët e luftës”, është zotuar Hamza.

Për pensionistët kontributdhënës, Hamza premtoi përshkallëzim të pensioneve, varësisht nga kontributet.

Duke e quajtur Drenicën vatër të heronjve, ai përmendi figura historike të kësaj treve.

Falënderoi edhe ish-liderët e kësaj partie: Hashim Thaçin e Kadri Veselin, por edhe Jakup Krasniqin e Rexhep Selimin, të cilët po gjykohen në Hagë.

Ai u shpreh i bindur se shumë shpejt do të lirohen.

Hamza ka shpalosur edhe  zotimet kryesore si kryeministër i ardhshëm, si rritja e pagave, rritje të pensioneve, ulje të tatimit në pagë, ulje e TVSH-së për artikuj esencialë, heqje e TVSH-së për energji elektrike, formimin e fondit për bursa në arsim.

Ka thënë se do të rritet asistenca sociale për 50 për qind, si dhe të gjitha pensionet që jepen nga buxheti i shtetit.

U zotua edhe për rritje të pagave prej 50 për qind për mjekët, mësimdhënësit, policët dhe të gjitha kategoritë që paguhen nga shteti.

Për fushën e arsimit tha se është perspektiva dhe ekonomia e vendit, tek premtoi 30 milionë euro bursa për studentë që duan të përfundojnë shkollimin për t’u kualifikuar për tregun e punës.

“Do të krijojmë fondin për bursa 30 milionë euro në vit. Çerdhe gjithandej Kosovës, shëndetësi me pacientin në qendër, sigurimet shëndetësore dhe mbi të gjitha personat e moshuar, me sëmundje kronike i sigurojmë se do të kenë furnizim me barna pa pagesë”, tha Hamza.

Kandidati për kryeministër, Bedri Hamza, tha se nën qeverisjen e tij do të punojë për anëtarësim të vendit në NATO, Këshillin e Evropës dhe shumë organizata të tjera ndërkombëtare, njohje nga pesë vende anëtare të BE-së dhe anëtarësim në familjen e madhe evropiane.

Gjatë ditës së mërkurë, përmes një videoje Hamza premtoi edhe ulje të tatimit në paga. Pagat deri në 400 euro, sipas tij, nuk do të tatohen fare, ato nga 400 deri në 800 euro do të tatohen me 8 për qind, ndërsa ato mbi 800 euro me 10 për qind.

Hamza në një video tjetër ka prezantuar planin e tij për mbështetje sociale dhe arsimore, duke premtuar se askush nuk do të lihet pas.

Ai ka treguar se në programin e tij parashikohet krijimi i një Fondi për Papunësinë, themelimi i Gjykatës së Punës, si dhe 30 milionë euro në vit për bursa studentore dhe mbështetje për çdo qytetar.

“Me mua kryeministër, askush nuk do të lihet pas. Fond për Papunësinë, Gjykatë të Punës, fond 30 milionë euro në vit për bursa studentore dhe mbështetje për çdo qytetar”, ka theksuar Hamza.

PDK-ja në zgjedhjet parlamentare të 9 shkurtit doli e dyta dhe siguroi 24 ulëse në Kuvend.

Kurti si kryeministër në detyrë ndan nga 100 euro për fëmijët e pensionistët

Kryeministri në detyrë dhe kandidat i Lëvizjes Vetëvendosje për një tjetër mandat, Albin Kurti, ka njoftuar të mërkurën se ekzekutivi që udhëheq ka vendosur të ndajë nga 100 euro për fëmijët deri në 16 vjeç dhe për pensionistët.

Në një postim në Facebook, duke i uruar ata për festat, Kurti ka thënë se me fitoren e VV-së, viti i ri vjen më herët.

Ai po ashtu ka kritikuar partitë deri tash në opozitë për mosvotim të buxhetit për vitin 2026.

“Sikurse çdo vit, edhe sivjet kemi vendosur të mbështesim fëmijët dhe pensionistët me shtesat e fundvitit prej 100 eurove. Mosvotimi i buxhetit nga opozita na e ka vështirësuar punën tej mase, mirëpo ne e kemi bërë të pamundurën që edhe këtë vit të sigurojmë mbështetjen e fundvitit, e cila do të procedohet para natës së Vitit të Ri”, ka shkruar Kurti në Facebook.

Ai ka premtuar edhe për profesionistët e fushave të mjekësisë e të arsimit.

Në një tubim në Kamenicë me infermierë, mjekë e mësimdhënës, ka thënë se nëse fiton edhe një mandat, do t’ua bëjë një dhuratë.

“Do ta ndërtojmë rrjetin e laboratorëve publikë për të gjitha llojet e analizave dhe po ashtu çdo qytetar i Kosovës do ta ketë një kontroll të plotë vjetor, një check-up, domethënë me i bë analizat një herë në vit, një kontroll me ua bë të gjithë qytetarëve, në mënyrë që në njërën anë, me pas një nivel të ri të mbikëqyrjes shëndetësore, por edhe një shans të madh për parandalimin e sëmundjeve”, ka thënë ai.

Për arsimin në Kamenicë, Kurti ka premtuar se investimet do të rriten për çerdhet, shkollat e universitetet dhe do të shtohen mbështetjet për studentët përmes dyfishimit të buxhetit për bursa.

Ai është shprehur se do ta fuqizohet cilësia e shkollimit të mesëm, ndërsa arsimit dual do t'i shtohen 10 profile të reja, krahas platformës me profile vetjake të secilit të diplomuar për qasje më të lehtë në tregun e punës.

Premtim për mbështetje të bujqve ka bërë kandidati i Lëvizjes Vetëvendosje për kryeministër, Albin Kurti, para qytetarëve në Junik. Këtë mbështetje ai ka thënë se do ta bëjë nëpërmjet kartës E-Fermeri, me anë të së cilës ata do të mund ta përcjellin me anë të celularëve të gjithë procesin e aplikimit për përfitim të subvencioneve. 

Nga Juniku, Kurti ka premtuar po ashtu se në qeverisjen e ardhshme do ta realizojë edhe sistemin e drenazhimit dhe të ujitjes, në përkrahje të punës së bujqve. Në ditën e tetë të fushatës për zgjedhjet e parakohshme të 28 dhjetorit, kandidati i LVV-së për kryeministër është zotuar për investime prej gjysmë miliardi euro në Brezovicë, ndërsa rreth 250 milionë euro ka premtuar se do t’i investojë për organizimin e Lojërave Mesdhetare 2030. Investime Kurti ka premtuar edhe për qendrën e re turistike “Dukagjini” e Bjeshkët e Nemuna i ka kualifikuar si jashtëzakonisht të përshtatshme për këtë qendër.

Kurti takime pati edhe në fshatin Korenicë, nga aty tha se në mbështetje të mërgatës si obligim për mandatin e ardhshëm 100 milionë euro do t’i ndajnë për “Dritaren për investime të diasporës”.

Abdixhiku: Përfundimi i autostradës së Gjilanit, prioritet absolut

Me thirrjet “Krejt Gjilani LDK”, simpatizantë të Lidhjes Demokratike e pritën kryetarin e kësaj partie, Lumir Abdixhiku, i cili është edhe kandidat për kryeministër. Këto brohoritje të qytetarëve pasuan fjalët në superlativ për Gjilanin, që i tha para mbështetësve kryetari i LDK-së.

“Gjilani nuk është një qytet i zhurmës, është një qytet i peshës së madhe. Nuk është një qytet i improvizimit, është qytet që kërkon drejtim. Këtu njerëzit punojnë mbarë, sepse jetuar gjithmonë mbarë”, ka thënë Abdixhiku.

Në këtë aktivitet parazgjedhor, Abdixhiku kritikoi qeverisjen qendrore. Aty dha premtimin se, nëse bëhet kryeministër, prioritet do ta ketë përfundimin e autostradës Prishtinë-Gjilan.

“Autostradën e lënë në lloq tash e 5 vjet, do ta përfundojmë në më pak se 20 muaj në qeverinë e ardhshme, me prioritet absolut. Do ta bëjmë me prioritet unë dhe ekipi ynë, do të jem në terren për ta bërë këtë rrugë të mundshme, realitet për Gjilanin, Kamenicën, për Preshevën, Medvegjën e Bujanocin”, ka thënë ai.

Përveç premtimeve në infrastrukturë, Abdixhiku dha zotime edhe për mbështetjen e familjes. Ai tha se do të themelojë ministri të veçantë për ta jetësuar zotimin.

“Në qendër të mbështetjes sonë kemi pasurinë tonë më të madhe kombëtare, kemi familjen tonë kosovare. Do të themelojmë menjëherë Ministrinë e Familjes dhe Mirëqenies, në mënyrë që familjes kosovare t’i japim mbështetje në çdo etapë të rritjes. Në Ministrinë e Familjes dhe Mirëqenies nga 200 euro në muaj për vitin e parë, pra 2400 për vit, do t’i jepen secilës familje me fëmijë në vitin e parë të lindjes së tij ose saj”, ka thënë ai.

Gjatë ditës, kandidati për kryeministër i LDK-së, Lumir Abdixhiku, ka premtuar pagë deri në 1 mijë euro për secilin mësimdhënës, si shenjë respekti real për profesionin dhe për dinjitetin e tyre.

Në takim me mësimdhënës në Prishtinë, në ditën e tetë të fushatës zgjedhore, ai ka thënë se zotimet e LDK-së për arsim janë të qarta dhe të panegociueshme.

Abdixhiku ka premtuar gjithashtu se në qeverisjen e tij do të ndërtohen 80 çerdhe të reja, në mënyrë që fëmijët të kenë fillim të duhur, ndërsa prindërit mbështetjen që u mungon.

 Në mesin e zotimeve për arsimin, ai ka numëruar mësimin tërëditor, shkolla më cilësore, barazi më të madhe dhe zhvillim të plotë të nxënësve. 

Kandidati i LDK-së për kryeministër ka premtuar edhe përfshirjen e kodimit dhe inteligjencës artificiale si lëndë mësimore në shkolla, në mënyrë që, siç ka thënë, Kosova të përgatitet për botën e së nesërmes dhe jo për të djeshmen.

E në një mesazh politik të shpërndarë nga “Bregu i Diellit”, të shoqëruar me një video të publikuar në Facebook nga kryetari i LDK-së, njëherësh kandidat për kryeministër, Lumir Abdixhiku, theksohet se Prishtina meriton një Qeveri që e ndihmon dhe e zhvillon, e jo një që e bllokon. 

Në përshkrimin e videos përmendet edhe shifra prej 1.5 miliardë eurosh si investim i nevojshëm për kryeqytetin.

“Nga Bregu i Diellit: Prishtina e meriton një Qeveri që nuk e bllokon, nuk e saboton, por e ndihmon. E zhvillon. ‘Qiti paret’; plot 1.5 miliardë euro për Kryeqytetin tonë”, ka shkruar Abdixhiku.

Në tubimin partiak në Prishtinë, kryetari i Komunës, Përparim Rama, ka thënë se me Lumir Abdixhikun kryeministër, sipas tij, nuk do të kishte nevojë për thirrje publike për lirimin e mjeteve financiare.

“Me Lumirin kryeministër nuk kemi nevojë të themi ‘qiti paret’. I qet paret me kënaqësi, sepse e do Prishtinën, e do Kosovën”, është shprehur Rama.  

Gjatë së mërkurës, Lidhja Demokratike e Kosovës me një video në Facebook ka renditur premtimet për prindërit. “Kjo është kontrata juaj me shtetin”, ka shkruar kryetari i LDK-së, Lumir Abdixhiku, si përshkrim të videos me premtime, në rast se kjo parti bën qeverinë pas zgjedhjeve të 28 dhjetorit.

Premtimi i parë në këtë aspekt është ndarja prej 2.400 eurosh për fëmijën në vitin e parë. Premtim i dytë është vazhdimi i shtesave deri në pesë vjet dhe për 80 çerdhe të reja.

Për fëmijët nga 6 deri në 11 vjet, LDK-ja ka premtuar mësim tërëditor dhe shujta të ngrohta për secilin fëmijë.

Adoleshenca deri në 16 vjet, sipas LDK-së, do të përfshijë kodimin në shkolla.

Për të rinjtë nga 16 deri 21 vjeç, LDK-ja ka premtuar trajnimin e 40 mijë të rinjve për teknologji informative.

“Pas diplomimit askush s’duhet të presë”, thuhet në videon e LDK-së që ka premtuar punësimin e garantuar me pagë prej 500 eurosh për 6-12 muajt e parë të punës.

“Një shtet që investon herët te qytetari, nuk paguan më vonë çmimin e papunësisë dhe emigrimit”, ka thënë Abdixhiku në këtë video.

Haradinaj premton prodhim të energjisë e anëtarësim në NATO

Prodhimi i energjisë dhe anëtarësimi në NATO janë dy punët e mëdha që kandidati për kryeministër nga Aleanca për Ardhmërinë e Kosovës, Ramush Haradinaj, ka premtuar se do t’i realizojë me të marrë mandatin.

Në tubimin e mbajtur me mbështetës të kësaj partie në kuadër të fushatës për zgjedhjet e parakohshme të 28 dhjetorit, Haradinaj i është rikthyer projektit për ndërtimin e centralit të gazit, për të cilin thotë se kishte punuar sa ishte në krye të Qeverisë në 2018-n.

“Centralin me gaz që prodhon energji do ta bëjmë në Ferizaj, anash Ferizajt. Mund të fillojmë në të njëjtën kohë që të punojmë për ta sjellë gazsjellësin, tubat dhe ta bëjmë në kohë rekorde. Po të duam përnjëmend, për vitin tjetër mos me qenë kështu si jemi sot”, ka thënë Haradinaj.

Ai ka përmendur edhe projektin për ndërtimin e termocentralit nga qymyri, për të cilin kontrata ishte nënshkruar në kohën e tij si kryeministër, por që më pas me ardhjen në pushtet të Vetëvendosjes, ai projekt është anuluar pas tërheqjes së investitorit.

“Kur kam dalë nga Qeveria herën e fundit, i kam lënë dy projekte të kontraktuara për të prodhuar energji. Një termocentral me qymyr 450 megavat, me çmim të lirë më së shtrenjti 80 euro megavati. Për t’ju treguar juve se nuk është shtrenjtë e keni ble deri në 1 mijë euro. E sot i ke plot në Kosovë që janë në terr, ose që punon një fazë e nuk munden me u nxehë”, ka theksuar Haradinaj.

Në fjalimin e tij përmendi edhe vizitat që i bënte në KEK sa ishte kryeministër në kohën kur kishte ndërprerje të rrymës.

“Me dhjetëra herë, natën kur nuk ka pasur rrymë unë kam shkuar në KEK. Kqyreni çfarë marrëdhënie kemi pasur, të tensionuar me menaxhment, dhe kemi thënë ose e gjejmë zgjidhjen për të pasur rrymë e për të mos rritur çmimin e rrymës, ose po shkojmë krejt unë nga Qeveria e ju prej këtu”, ka theksuar Haradinaj.

E një punë tjetër që, sipas tij, do të kryhet nëse ai vihet në krye të Qeverisë është anëtarësimi i Kosovës në NATO.

“Puna e dytë që dua ta kryej në Kosovë është anëtarësimi në NATO. E di rrugën e anëtarësimit në NATO. E di edhe adresën, ku anëtarësohesh”, ka pohuar Haradinaj, duke përmendur takimet me udhëheqës të kësaj force.

Ai ka thënë se me ketë ia “lehtësojnë” punën Serbisë që ta njoh Kosovën, pasi, siç ka thënë, “nuk ka kah ia mban”.

Haradinaj nuk ka lënë anash as premtimet e tjera. Përmendi rritjen e pagave, shtesave për fëmijë e pensioneve.

Sipas tij, asnjë pagë nuk do të jetë më e vogël se 1 mijë e 100 euro.

“Kemi menduar për prindërit tonë. Mos harroni, nuk janë pensionistë, janë prindërit tanë. Nëna dhe babi ynë, ata që së pari na kanë lindë ne, e pastaj e kanë bërë këtë vend. Duhet ta japin provimin, duke i dhënë pension të njerëzishëm”, ka thënë ai.

E për Klinën premtoi rregullimin e kanalizimeve, e ndërtimin e shtratit të lumit.

“Votoni se edhe ju e keni në dorë se çfarë do të ndodhë me vendin tonë. Vota juaj i jep drejtim vendit. Unë nuk po e kërkoj votën sa për të marrë pak pushtet. Po kërkojë votën për t’i kryer këto dy punë të mëdha për Kosovën”, ka thënë Haradinaj.

Sipas tij, gjysma e rrugës është bërë në kohën sa ka qenë në pushtet si për punën e rrymës ashtu edhe për anëtarësimin e NATO-s, por do t’u kthehet sërish atyre punëve.

E duke mos dashur që të përmendë emra për punën e tregtarëve për energji, ka thënë se importin nga ky vend e ka ndalur duke vendosur taksën 100 për qind ndaj Serbisë.

“Po thonë, jo Ramushi kështu. Ai që i ka vendosur taksë Serbisë, e ka pavarësuar sistemin energjetik, i ka futur në funksion interkoneksionin me Shqipërinë, ai që e ka bërë ushtrinë, ai që e ka bërë Trepçën”, ka thënë ai.

Gjatë ditës, Haradinaj i ka uruar edhe besimtarët e krishterë me rastin e Krishtlindjeve.

AAK në këto zgjedhje garon e vetme. Në zgjedhjet e 9 shkurtit AAK në koalicion me Nismën Socialdemokrate mori 7 për qind të votave, duke siguruar 8 ulëse në Kuvendin e Kosovës.

Abdixhiku “i qet paret”, i premton 1.5 miliardë euro për kryeqytetin

Në një mesazh politik të shpërndarë nga Bregu i Diellit, të shoqëruar me një video të publikuar në Facebook nga kryetari i LDK-së, njëherësh kandidat për kryeministër, Lumir Abdixhiku, theksohet se Prishtina meriton një Qeveri që e ndihmon dhe e zhvillon, e jo një që e bllokon. 

Në përshkrimin e videos përmendet edhe shifra prej 1.5 miliardë eurosh si investim i nevojshëm për kryeqytetin.

“Nga Bregu i Diellit: Prishtina e meriton një Qeveri që nuk e bllokon, nuk e saboton, por e ndihmon. E zhvillon. ‘Qiti paret’; plot 1.5 miliardë euro për Kryeqytetin tonë”, ka shkruar Abdixhiku.

Në tubimin partiak në Prishtinë, kryetari i komunës, Përparim Rama, ka thënë se me Lumir Abdixhikun kryeministër, sipas tij, nuk do të kishte nevojë për thirrje publike për lirimin e mjeteve financiare.

“Me Lumirin kryeministër nuk kemi nevojë të themi ‘qiti paret’. I qet paret me kënaqësi sepse e do Prishtinën, e do Kosovën”, është shprehur Rama.  

Me këtë deklaratë ai rikujtoi akuzat e tij të mëhershme ndaj Ministrisë së Financave, për të cilën thoshte se ka mbajtur jashtëligjshëm 35 milionë euro, mjete të cilat i kërkonte duke thënë “qiti paret ministër”.

Zëdhënësi i AAK-së për reduktimet e energjisë: Mos lësho pe Albin, përfitoni nga vjedhja e rrymës

Zëdhënësi i Aleancës për Ardhmërinë e Kosovës, Kushtrim Xhemaili, njëherësh kandidat për deputet nga kjo parti, ka reaguar ndaj reduktimeve të energjisë elektrike, duke akuzuar qeverinë në detyrë për keqmenaxhim dhe papërgjegjësi.

Përmes një postimi në Facebook, Xhemaili ka thënë se partia deri tash në pushtet po përfiton nga blerja dhe vjedhja e rrymës.

“Mos lësho pe, Albin – ju në dritë, na në errësirë. Reduktimet po i çmendin qytetarët. Familjet dhe bizneset po detyrohen të blejnë gjeneratorë, ndërsa jetojmë në vitin 2025”, ka deklaruar Xhemaili.

Ai ka shtuar se, në vend të zgjidhjes së problemit, qytetarët po paralajmërohen për rritje të çmimeve të rrymës, duke e quajtur situatën “të mjerueshme”.

Bedri Hamza në Malishevë: Do ta themelojmë Fondin e Papunësisë dhe Gjykatën e Punës

Kandidati i Partisë Demokratike të Kosovës për kryeministër, Bedri Hamza ka qëndruar mbrëmë në Malishevë, ku ka thënë se programi i tij ofron zgjidhje reale, të llogaritura dhe të financuara qartë.
Hamza tha se programi i tij bazohet në katër shtylla: zhvillim ekonomik dhe mirëqenie, arsim dhe shëndetësi, drejtësi dhe mbrojtje e politikë e jashtme.

Hamza ka thënë së punëtori do të jetë në qendër të politikave të qeverisë së udhëhequr nga ai, prandaj do ta themelojnë Fondin e Papunësisë dhe Gjykatën e Punës.

“Vota për PDK-në shkon në numrin 130. Kjo është adresa, nuk ka adresë tjetër. Prandaj, fitorja e PDK-së, ju gëzon juve, më gëzon mua, por të jeni të bindur që i gëzon dhe i bën krenarë Hashim Thaçin dhe Kadri Veselin”, ka shtuar ai.

LDK-ja prezanton premtimet për prindërit

Lidhja Demokratike e Kosovës me një video në Facebook ka renditur premtimet për prindërit. “Kjo është kontrata juaj me shteti”, ka shkruar kryetari i LDK-së, Lumir Abdixhiku, si përshkrim të videos me premtime, në rast se kjo parti bën qeverinë pas zgjedhjeve të 28 dhjetorit.

Premtimi i parë në këtë aspekt është ndarja prej 2400 eurosh për fëmijën në vitin e parë. Premtim i dytë është vazhdimi i shtesave deri në pesë vjet dhe për 80 çerdhe të reja.

Për fëmijët nga 6 deri në 11 vjet, LDK-ja ka premtuar mësim tërëditor dhe shujta të ngrohta për secilin fëmijë.

Adoleshenca deri në 16 vjet, sipas LDK-së, do të përfshijë kodimin në shkolla.

Për të rinjtë nga 16 deri 21 vjeç, LDK-ja ka premtuar trajnimin e 40 mijë të rinjve për teknologji informative.

Në fund është punësimi. “Pas diplomimit askush s’duhet të presë”, thuhet në videon e LDK-së që ka premtuar punësimin e garantuar me pagë prej 500 eurosh për 6-12 muajt e parë të punës.

“Një shtet që investon herët te qytetari, nuk paguan më vonë çmimin e papunësisë dhe emigrimit”, ka thënë Abdixhiku në këtë video.