Limaj s’pret që institucionet e reja të formohen para 15 dhjetorit

05 November 2019 20:15
21:24

Kryetari i Nismës Socialdemokrate, Fatmir Limaj, ka thënë se nuk pret që institucionet e reja të Kosovës të formohen para 15 dhjetorit.

Edhe pse procesi i numërimit të votave nga zgjedhjet e 6 tetorit po shkon drejt fundit, ai ka thënë se ankesat do të bëjnë që të shtyhet gjithçka, pasi sipas tij, është i domosdoshëm rinumërimi i plotë i votave.

Për negociatat mes VV-së e LDK-së për formimin e qeverisë, Limaj ka thënë se duhet të kenë kujdes nga arroganca.

“Duhet të kenë kujdes nga arroganca. Partia e cila ka dalë e para në zgjedhje duhet ta ketë parasysh që ka vetëm 25 për qind të vullnetit të qytetarëve dhe janë edhe 75 për qind. Ju jeni partia e parë por nuk e keni besimin e gjithë qytetarëve të Kosovës meqë por ka edhe grupe të tjera parlamentare dhe duhet të uleni e të bisedoni edhe me partitë e tjerë, në këtë rast Lidhjen Demokratike”, ka deklaruar ai.

21:14

Limaj: Po të ishte VV-ja në vendin tonë do ta kallte KQZ-në

Fatmir Limaj, kandidat për kryeministër nga koalicioni Nisma-AKR-PD, ka thënë se sikur Vetëvendosje të kishte problemin sikur Nisma me votat e ardhura nga Serbia, “do ta kallte KQZ-në”.

Në Rubikon të KTV-së, Limaj ka thënë se “ata që po heshtin sot, po e bëjnë për shkak që të përfitojnë ulëset në Kuvend”.

“T’i kishte ndodhur kjo Vetëvendosjes, do ta kishin kallur KQZ-në deri tash. Ata po heshtin, nuk është e vështirë të dihet, Vetëvendosje ka heshtur në votat e serbëve, dhe po vazhdon të heshtë”, ka shtuar ai.

Koalicioni Nisma-AKR-PD, sipas votave të deritashme, është nën pragun zgjedhor prej 5 për qind. Me pranimin e më shumë se 3500 votave të ardhura nga Serbia shanset që kjo parti të kalojë pragun janë zbehur edhe më shumë.

21:04

Limaj i quan të kontrabanduara 3500 zarfet nga Serbia, thotë se zyrtarisht ishin vetëm pesë vota

Fatmir Limaj i koalicionit Nisma-AKR-PD ka thënë se 3500 zarfet të ardhura me vota nga Serbia ishin kontrabanduar në Kosovë.

Sipas tij, zyrtarisht nga Serbia ishin vetëm pesë vota.

Ai ka thënë se me lejimin që “votat nga Serbia të vijnë duke u bartur fizikisht” është treguar se “Ligji i Kosovës për shtetasit e saj me të drejtë vote e që jetojnë jashtë vendit, ka vlejtur për të gjitha vendet e botës, pos Serbisë”.

Edhe pse në zarfe ishin më shumë se 3500 vota, Limaj ka thënë se zyrtarisht nga Serbia ishin pesë vota.

“Kam dokument në raportin e tyre që tregon se nga Serbia kanë ardhur vota individuale, shtetas të Kosovës që kanë pasur mundësi sikur të krejt botës, të votojnë me postë. Kanë ardhur pesë vota nga Serbia. Kushdo që ka dashur të votojë ka mundur ta bëjë këtë”, ka shtuar ai.


Limaj thotë se KQZ-ja favorizoi serbët e diskriminoi shqiptarët

Fatmir Limaj në Rubikon të KTV-së ka thënë se Komisioni Qendror i Zgjedhjeve ka favorizuar etninë serbe përmes votave të sjella nga Serbia dhe ka diskriminuar atë shqiptare.

“KQZ ka favorizuar në mënyrë jo ligjore të ashtuquajtuara vota nga Serbia. Ky është diskriminim dhe shkelje e të drejtave të qytetarëve. Duhet të ngrihet zëri ndaj kësaj”, ka thënë ai.

Ndërsa lidhur me vendimin e gjykatës Supreme, Limaj ka thënë se përmes një vendimi të tillë, Supremja ka dal jashtë kompetencave të saj duke ndryshuar ligjin.

“Vendimi i PZAP-së për votat e Diasporës është vendim i saktë me ligjin ndërsa Supremja ka dal jashtë kompetencave të saj. Në vendimin e Supremes shihet se ligji është i ndryshuar”, ka shtuar ai.

20:32

Limaj kërkon rinumërim të plotë të votave: Do t’i shkojmë procesit deri në Kushtetuese

Fatmir Limaj, kandidat për kryeministër nga koalicioni Nisma-AKR-PD, këmbëngul se duhet një rinumërim i plotë për zgjedhjet e 6 tetorit, që deri tash këtë koalicion e vënë nën prag zgjedhor.

Sipas tij, ka gabim të madh në numërim dhe “këtë e ka vërtetuar rinumërimi i pjesshëm”.

“Duke e parë që gabimi është lëshuar nga qendra, atëherë mund të themi se komisionerët, duke u ballafaquar më gabimin, kanë ndërhyrë vetë në këtë fletëbartje duke shkelur ligjin. Ata kanë pasur qëllim të mirë mirëpo me këtë e shkel ligjin”, ka thënë Limaj.

Ai ka thënë se do t’i shkojnë procesit deri në fund duke përfshirë këtu edhe Gjykatën Kushtetuese. Ka shtuar se do të procesin deri në fund procesin, pasi deri tash “PZAP-ja na ka refuzuar”.

“Është diçka që ne po krijojmë një precedent se mund të ndërhyhet. Ajo që po flas unë sot nuk është kauzë e Nismës por e drejtësisë. Natyrisht që ne jemi drejtpërdrejt të atakuar. Ne si shoqëri, atyre që i kemi zgjedhur ta përcjellin procesin, t’u kërkojmë llogari. I gjithë ky proces ka mund të na dështojë për shkak të administrimit”, ka thënë Limaj tutje.

20:24

Limaj: Ata që gabuan me formularët në zgjedhjet e 6 tetorit do të duhej të shkonin në shtëpi

Duke u ankuar për problemet në procesin e numërimit dhe gabimet në formularët e votave në vendvotime, kryetari i Nismës Socialdemokrate, Fatmir Limaj, ka thënë se zgjedhjet e 6 tetorit janë administruar më së keqi deri tash në Kosovë.

Sipas tij, çdokush që ka pasur gisht në gabimet e formularëve është dashur të jepte përgjegjësi e të largohej nga vendi i punës.

“Kur ne e kemi alarmuar situatën për formularët që u mungonte një rubrikë, KQZ, nëse nuk gaboj pas dy ditëve e konstaton gabimin dhe thotë po, kemi një gabim teknik në formular dhe thotë se është e pamundur të procedohet bartja e rezultateve zgjedhore me këta formularë me këto gabime dhe si rezultat KQZ merr vendim për rinumërim të pjesshëm”, ka thënë Limaj. “Në vend që KQZ të merr vendim menjëherë, të pranoj gabimin në tërësi dhe jo pjesërisht, ka ndodhur një gabim teknik, për të ruajtur integritetin e zgjedhjeve, është dashur të bëhej menjëherë rinumërimi”.

“Kur është lexuar vullneti i popullit ka pasur devijime”, ka shtuar ai.

Sipas Limajt, administrimi i zgjedhjeve nga KQZ-ja në zgjedhjet e 6 tetorit ka qenë më i keqi deri tash.

“Të gjithë ata njerëz do të duhej të shkonin në shtëpi. Ata kanë veç atë punë, për një gabim të tillë që ka mundur të sjellë devijim të vullnetit qytetar duhet të jepet përgjegjësi. Por KQZ në vend që të marrë përgjegjësi ajo zgjodhi rrugën më të keqe. Ka qenë procesi më së keq i administruari deri tash”, ka deklaruar më tej Limaj.

20:15

Limaj: Nisma është parti parlamentare

Kryetari i Nismës Socialdemokrate, Fatmir Limaj, ka përsëritur qëndrimin se partia e tij, në koalicionin me AKR-në e PD-në, ka kaluar pragun zgjedhor prej 5 për qind në zgjedhjet e 6 tetorit.

Edhe pse sipas të dhënave publike, kjo parti është nën prag, Limaj ka thënë se sipas rezultateve aktuale, Nisma-AKR-PD është pjesë e Kuvendit.

“Nisma dhe koalicioni është parti parlamentare”, ka thënë ai duke vazhduar se procesi zgjedhor kishte nisur mirë më 6 tetor, por “problemet u shfaqën në pjesën e dytë të zgjedhjeve”.

“Të flas për procesin si tërësi. Dita e zgjedhjeve, ishte ditë jashtëzakonisht e mirë, kur procesi u var nga qytetarët që iu përgjigjën obligimit. Pati dalje masive, ishte dalja më e madhe, me ndonjë incident sporadik apo problem teknik. Dita e 6 tetorit ishte ndër ditët më të mira. Deri sa ishte i varur nga qytetarët, dalja, pjesëmarrja, votimi, gjithçka shkoi në rregull. Problemet u shfaqën në pjesën e dytë të zgjedhjeve. Problemi që hasëm ishte pas mbylljes së kutive kur nisën të vijnë rezultatet”, ka thënë ai në Rubikon të KTV-së.

Sipas Limajt, problemi më i madh ishte gabimi në formularët e vendvotimeve.

© KOHA. Të gjitha të drejtat janë të rezervuara.

Komentet

Shto koment

Të ngjashme