Xhipi i zi si monument i luftës

A duhet të jenë pasurimi i shpejtë dhe babëzia monument i luftës? Fatkeqësisht, shumë raste në Kosovën e pasluftës e vërtetojnë një gjë të këtillë

NJËRA NGA KËTO ditë do të jetë dita e 7.300-të që nga përfundimi i luftës. 7.300 ditë do të thotë 20 vjet.

7.300 është numër më i vogël se numri 10.495. Kaq llogaritet të jetë numri i shqiptarëve të vrarë në Kosovë, në periudhën janar 1998 – dhjetor 1999, sipas FDH-së.

7.300 është numër më i vogël se numri 20.000. Kaq llogaritet të jetë numri i dhunimeve seksuale gjatë luftës në Kosovë, sipas organizatave të ndryshme të të drejtave të njeriut.

7.300 është numër më i vogël se numri 120.000. Kaq llogaritet të jetë numri i shtëpive dhe pronave të shqiptarëve të shkatërruara gjatë luftës, sipas UNHCR-së.

Edhe Arbëri 1 gus 2026 Haxhiu: Instituti të vazhdojë me dokumentimin e krimeve të luftës

7.300 është numër më i vogël se numri 590.000. Kaq llogaritet të jetë numri i shqiptarëve të zhvendosur nga shtëpitë e tyre brenda Kosovës, vetëm deri në maj të 1999-s, sipas UNHCR-së.

7.300 është numër më i vogël se numri 863.000. Kaq llogaritet të jetë numri i shqiptarëve të dëbuar nga Kosova, vetëm brenda periudhës mars – qershor 1999, sipas OSBE-së.

ÇKA KANË BËRË shqiptarët e Kosovës për këto 7.300 ditë, për të evidentuar, dëshmuar, dënuar këto krime? Çka kanë bërë liderët e shqiptarëve të Kosovës për këto 7.300 ditë?...

Nëse dikush sot dëshiron t’ia tregojë aparteidin dhe përpjekjen për gjenocid ndaj shqiptarëve gjatë viteve ’90 nuk e ka fare të lehtë.

Viktima shqiptare, gjatë këtyre 7.300 ditëve nuk ka qenë vetëm viktimë e regjimit serb, por edhe viktimë e vetë shqiptarëve në liri.

Liderët politikë të pasluftës më shumë ngarendën që secili t’i kujtojë “heronjtë e vet” sesa martirët, qytetarët civilë. Për këtë arsye sot e kësaj dite në Kosovë ka vetëm një monument, i cili kujton viktimat e luftës, kurse ka me qindra monumente që kujtojnë luftëtarët.

Respekt deri në fund për secilin që nuk e ka kursyer edhe vetë jetën që të tjerët të gëzojnë lirinë, por jo shumë respekt për liderët shokë të tyre, të cilët, duke dashur t’ua japin respektin, kanë llogaritur në përfitimet e veta. Se, është e thjeshtë, shokët me pushkë në dorë edhe në bronz mund t’u sjellin vota, viktimat nuk u sjellin asnjë votë.

Viktimat sjellin vetëm pasqyra.

Për këtë arsye deri më sot nuk e kemi asnjë muze të luftës, por kemi me mijëra personazhe që krekosen në emër të luftës.

CILAT JANË MONUMENTET e vërteta të luftës në Kosovë?

Ka një numër të atyre që e kanë përdorur luftën për përfitime të pasluftës (respekt për përjashtimet). Për këtë arsye sot nuk është e jashtëzakonshme që ta shohësh një shtëpi superluksoze të ndonjë lagjeje elite të qyteteve dhe ta ndërlidhësh me ndonjë personazh nga lufta. Nuk është farë e jashtëzakonshme të shohësh xhipa të zinj super të shtrenjtë dhe t’i ndërlidhësh me personazhe nga lufta.

A duhet të jenë pasurimi i shpejtë dhe babëzia monument i luftës? Fatkeqësisht, shumë raste në Kosovën e pasluftës e vërtetojnë një gjë të këtillë.

Sa për viktimat dhe dëmet e luftës jemi kujtuar sot, pas 7.300 ditëve nga lufta (a janë kujtuar?!).

Drejtësi?

Deri më sot ishte pabarazi.

Babëzi.

Mujshi.

Edhe Arbëri 29 kor 2026 Kosovës iu deshën 9,909 ditë për t’i dokumentuar 12,230 viktimat e luftës

[email protected]

Twitter: @adriatikk