Topi është te Thaçi

Tash topi është te presidenti Hashim Thaçi. Kryeministri i Kosovës, Albin Kurti, ka lëvizur në drejtimin e drejtë të hapjes së tij për bashkëbisedim, bashkëpunim dhe bashkëveprim me presidentin.

Thaçi, Kurti, kryesuesit e institucioneve dhe opozitës, si dhe njerëzit e tjerë tanë të nevojshëm duhet të koordinohen, të vendosin dhe të veprojnë njëzëshëm, ndërkaq provohet mbyllja dhe finalizimi i njohjes ndërshtetërore Kosovë-Serbi.

Ka dyshime, kryesisht të pabazuara, që e shohin Kurtin si të ngurtë vis-a-vis amerikanëve, por hezitimet e Kurtit burimin e kanë te drynat e Hashim Thaçit. Prandaj Thaçi duhet të hapë të gjitha dyert dhe deriçkat dhe Albin Kurti duhet të ulet në çdo tavolinë ku bisedohet dhe nga ku do të vijë Marrëveshja Finale Kosovë-Serbi.

Hapja e krahut e Hashim Thaçit, në fakt, e zbulon aftësinë gjegjësisht paaftësinë e Kurtit të jetë burrështetas respektivisht përmbushës apo iluzion i shpresave tona. Nëse Kurti eventualisht tregohet dogmatik, Kurti do të vetëpërjashtohet dhe do ta humbë përkrahjen popullore dhe kombëtare. Unë jam i bindur që Albin Kurti kur vjen puna te interesi kombëtar nuk do të lëkundet as të sakrifikojë, por as të bëjë kompromise nëse neto-rezultati është përfitues për shqiptarët.

Presidenti Hashim Thaçi nuk mund të vazhdojë të mbajë çelësin e monopolit të informatave dhe bisedimeve, sidomos me amerikanët, pa prani dhe kontribut të përgjegjësve të tjerë. Ardhja e Albin Kurtit në krye të Qeverisë është ngritje çmimi dhe vlerë e pozicionit të Kosovës në proces.

Kryeministri Albin Kurti afër presidentit Hashim Thaçi do ta forcojë pozicionin e presidentit dhe anasjelltas. Kur jemi bashkë forcohet pozicioni i Kosovës. Hashim Thaçi, më në fund, duhet t'i hapë të gjitha kyçet dhe drynat. Hanibali i Epokës së Re për Kosovën është ante portas.