Agron Kuka: Suksesi në Tokio është mrekulli

Kryetari i Federatës së Xhudos të Kosovës (FXHK), Agron Kuka, ka mbetur i kënaqur me paraqitjen e ekipit kosovar të xhudos në Lojërat Olimpike “Tokio 2020”.

Në fakt, suksesin e xhudistëve të Kosovës, Kuka në një intervistë për KOHËN, e ka quajtur mrekulli. Në Olimpiadë, Kosova u përfaqësua me pesë xhudistë, që të gjithë me normë dhe i fitoi dy medalje të arta. Distria Krasniqi dhe Nora Gjakova me paraqitjet e tyre fantastike siguruan suksesin e Kosovës në paraqitjen e dytë në Lojërat Olimpike. Krasniqi triumfoi në kategorinë deri 48 kilogramë, ndërsa Gjakova në atë deri 57 kilogramë.

KOHA: Po e mbyllim një paraqitje impresive në Tokio, cili është vlerësimi juaj?

Agron Kuka: Në Lojërat Olimpike këtu në Tokio si Federatë e Xhudos e Kosovës kemi qenë pjesëmarrës me pesë garues, që të pestët kanë qenë me normë olimpike. Distria ka qenë e para në ranglistë e deri te Akili, që ishte i nënti. Dy medalje të arta të fituara me të vërtetë është mrekullia vetë, jo pse jam i befasuar, por e di se prapa këtij suksesi është një punë e gjatë, e mundimshme, sakrificë dhe përkushtim jetësor. Të gjithë këta garues janë duke bërë regjimin e njëjtë me vite të tëra. Janë garuesit që dy vjetët e fundit kanë pasur një paraqitje të shkëlqyeshme, katër prej tyre kanë pasur medalje botërore, të pestët kanë pasur medalje evropiane dhe prandaj me vet rezultatin jam shumë i kënaqur edhe pse Majlinda, Loriana nuk e kanë pasur ditën e tyre. Majlinda e dimë që e ka trajtuar një lëndim me vite të tëra. Ka qenë momenti ndoshta të tërhiqet më herët nga garat aktive, por dëshira e saj e madhe dhe këmbëngulësia e saj e natyrisht edhe dëshira e Tonit ka qenë që në Tokio ekipi të jetë i kompletuar. Ajo është udhërrëfyesja e të gjitha rezultateve dhe të arriturave të xhudos kosovare dhe është e para me suksese nga kampionatet evropiane, botërore, si dhe Lojërat Olimpike. Loriana është ende e re, edhe pse pritjet tona në fillim të karrierës i ka tejkaluar duke marrë medalje në botëror dhe dy evropiane. Ne mendoj se koha e saj do të vijë në Lojërat Olimpike në Paris. Jam i kënaqur që jam prapa tyre, para dhe anash, kurdo që kanë nevojë. E meritojnë çdo sakrificë timen dhe ekipit. I falënderoj për sakrificën dhe mundin duke filluar nga Toni e deri te xhudistët.

KOHA: Cila është qasja e Federatës Botërore dhe asaj Evropiane të xhudos ndaj Kosovës?

Agron Kuka: Që nga fillet, njoftimin me kryetarin e Federatës Ndërkombëtare të Xhudos, ata e kanë vërejtur që ne jemi Federatë serioze dhe motoja e Federatës është ‘puna dhe vetëm puna’, prandaj që prej fillimit e kemi pasur mbështetjen e tyre. Është kënaqësi që gjithë atë mbështetje që e kemi pasur t’ua kthejmë me rezultate e kjo me të vërtetë është ndjenjë e mirë. ua kthejmë me rezultate e kjo me të vërtetë është ndjenjë e mirë. Çdo mbështetje e tyre dhe nga institucionet e Kosovës jemi munduar t’ua kthejmë me rezultate. Kjo është mënyra më falënderuese. Kjo vlen edhe për Federatën Evropiane edhe kreun nuk e kanë nga një shtet që nuk është aq miqësor ndaj nesh, por në sport e sidomos me sportin e xhudos janë korrekt dhe na kanë dalë në përkrahje.

KOHA: Majlinda u pensionua, cili do të jetë roli i saj në ekip?

Agron Kuka: Unë mendoj se ajo duhet së pari të pushojë, pasi ka 22 vjet që ka një regjim të fortë të stërvitjeve, pasi edhe pas Lojërave Olimpike të Rios pushimi i saj ka qenë vetëm një javë, kështu që dëshira ime e po ashtu edhe e ekipit është që ajo të mbetet në xhudo në një rol tjetër. Ekipi profesional i xhudos është rritur përtej përmasave dhe kapaciteteve që ne mund ta menaxhojmë. Ndihma e saj si trajnere apo asistente e Tonit do të ishte e madhe duke ditur që në botën e xhudos maksimalisht mund t’i ketë në kontroll 3-4 garues e ne i kemi diku 30 potencial që prej Lojërave Olimpike të Parisit. Pres që pas pushimit t’i bashkohet ekipit në rolin e trajneres.