Windows 10 do të kërkojë që kompjuterët t’i kenë të paktën 32GB hapësirë për ruajtje

Rreth katër vjet më parë, Microsofti njoftoi se Windowsi më në fund do të bëhet pak "më i lehtë", pra të zërë më pak hapësirë. Kompania për Windows 10 i kërkoi 16GB si hapësirë minimale, ndërsa tani ky kapacitet është dyfishuar, raporton “SlashGear”.

Kur dihet kapaciteti minimal i ruajtjes për softuer, prodhuesit e harduerit nuk kanë shumë zgjedhje dhe duhet t’i pajisin pajisjet e tyre për më shumë hapësirë. Kur Microsofti i uli kërkesat për Windows 10 në 16GB, kjo iu dha prodhuesve (kryesisht tabletëve buxhetorë dhe mini-PC-ve) justifikimin për ta përfshirë një hapësirë minimale prej 32GB në pajisje. Këto ditë, madje edhe telefonat kanë më shumë hapësirë (duke mos i llogaritur modelet nga segmenti i ulët).

Është edhe një arsye se pse Microsofti po e rrit limitin. Më herët këtë vit, kompania njoftoi se i rezervon 7GB për "Reserved Storage ", për t’u siguruar që azhurnimet të mos ndërpriten nëse pajisja mbetet pa memorie. Me një hapësirë prej 16GB e cila kërkohet dhe 7GB për Reserved Storage, përdoruesve me 32GB hapësirë do t’u mbeteshin vetëm 5GB hapësirë për nevojat e tyre.

Microsofti tani e ka rritur minimumin e kërkuar për Windows 10 në 32GB, duke filluar nga azhurnimi 1903 (maj 2019). Kërkesa vlen për sistemet 64-bitëshe dhe 32-bitëshe. Në praktikë, kjo do të kërkonte nga prodhuesit t’i instalojnë të paktën 64GB hapësirë në kompjuterët e tyre, shkruan KOHA Ditore.

Kjo me siguri nuk do të jetë problematike për sistemet më të reja që arrijnë gjatë vitit, por mund të jetë problem për pajisjet ekzistuese që i kanë vetëm 32 GB hapësirë. Këto PC nuk do të jenë në gjendje ta azhurnojnë versionin 1903 të Windows 10 dhe u mbetet versioni 1809 i cili skadon në vitin 2020, gjë që do t’i shtyjë shumë përdorues ta bëjnë azhurnimin e PC-së.