Snapchati po largon dhjetëra fëmijë në Britani nga platforma e tij çdo muaj, sipas të dhënave të rregullatorit britanik të medias “Ofcom”, raportoi të dielën Reuters.
Platformat e mediave sociale si Instagrami i Metas, TikTok i ByteDances dhe Snapchati i Snapit kërkojnë që përdoruesit të jenë të paktën 13 vjeç. Këto kufizime synojnë të mbrojnë privatësinë dhe sigurinë e fëmijëve të vegjël.
Përpara projektligjit të planifikuar të Britanisë për Sigurinë Online , që synon mbrojtjen e përdoruesve të mediave sociale nga përmbajtja e dëmshme si pornografia e fëmijëve, Ofcomi ka kërkuar nga TikToku dhe Snapchati të tregojnë se sa persona të dyshuar nën moshën 13-vjeçare kanë hapur llogari të tyre në një vit.
Sipas të dhënave, TikToku ka njoftuar se midis prillit të vitit 2021 dhe atij të 2022-tës, kishte bllokuar mesatarisht rreth 180,000 llogari të dyshuara për të mitur në Britani çdo muaj, ose rreth dy milionë në atë periudhë 12-mujore.
Në të njëjtën periudhë, Snapchati zbuloi se kishte hequr afërsisht 60 llogari në muaj, ose pak më shumë se 700 në total.
Një zëdhënës i Snapit ka thënë se shifrat keqinterpretonin shkallën e punës që kompania bëri për të mbajtur jashtë platformës së saj fëmijët nën 13 vjeç.
“Ne i marrim këto detyrime seriozisht dhe çdo muaj në MB bllokojmë dhe fshijmë dhjetëra mijëra përpjekje nga përdoruesit e mitur për të krijuar një llogari në Snapchat”, është shprehur ai.
Edhe
Snapchati po hetohet në SHBA për shkak të përdoruesve nën moshën 13 vjeç
Hulumtimet e fundit të Ofcom sugjerojnë se të dy aplikacionet janë njësoj të popullarizuar me përdoruesit e mitur.
Aktualisht, kompanitë e mediave sociale janë përgjegjëse për vendosjen e kufijve të moshës në platformat e tyre. Megjithatë, sipas projektligjit të shumëpritur të sigurisë në internet, atyre do t'u kërkohet me ligj që të respektojnë këto kufizime dhe të demonstrojnë se si po e bëjnë këtë, për shembull nëpërmjet teknologjisë së verifikimit të moshës.
Kompanitë që nuk respektojnë kushtet e tyre të shërbimit përballen me gjobë deri në 10% të fitimit të tyre vjetor.
