Samsungu shënon fitim rekord, por humb mbi 100 miliardë dollarë në vlerë tregu

Gjiganti jugkorean i teknologjisë Samsung Electronics ka raportuar rritje rekord të fitimit operativ për tremujorin prill-qershor, i nxitur nga kërkesa e lartë për çipat e memories të përdorur në zhvillimin e inteligjencës artificiale.

Pavarësisht rezultateve financiare, investitorët reaguan me shitje masive të aksioneve, duke i fshirë kompanisë më shumë se 100 miliardë dollarë nga vlera e tregut, raportoi Reuters.

Sipas parashikimeve të publikuara nga kompania, fitimi operativ për tremujorin arrin në rreth 51 miliardë euro, gati 19 herë më i lartë se në të njëjtën periudhë të vitit të kaluar. 

Ky është tremujori i tretë radhazi me rezultate rekord për Samsungun dhe një fitim më i madh sesa ai i realizuar në tri vitet e fundit së bashku.

Samsung pritet të publikojë raportin e plotë financiar më 30 korrik, ku do të prezantohen rezultatet sipas divizioneve të biznesit. Pritet që ky raport të japë sinjale më të qarta nëse rritja aktuale e industrisë së memories përfaqëson ndryshim strukturor të tregut apo vetëm një tjetër cikël të përkohshëm të kërkesës.