Gjiganti teknologjik, Facebook, të enjten ka lansuar një test të aplikacionit të punës në distancë, në një realitet virtual, ku përdoruesit e pajisjeve “Oculus Quest 2” mund të mblidhen bashkë si versione avatare.
Testi i aplikacionit “Horizon Workrooms” vjen pasi shumë kompani nisën të punonin nga shtëpia për shkak të pamundësisë që të dilnin në vendet e punës si rrjedhojë e pandemisë Covid-19.
Facebooku po e sheh lansimin e fundit si hap fillestar të ndërtimit të “metaverses”, të cilën e ka paralajmëruar qe disa javë.
Rrjeti më i madh social ka investuar shumë në realitetin virtual dhe atë të shtuar, duke zhvilluar pajisje të caktuara, duke punuar në syza të veçanta e teknologji të rripave të dorës.
Dominimin në këtë hapësirë, Facebooku mendon ta shfrytëzojë që të jetë platforma e së ardhmes, ku përdoruesit do të varen më pak në pajisje të tjera.
Termi “metaverse” përdoret për të shpjeguar platformat e përbashkëta ku takohen bota fizike me atë digjitale.
