Angela Merkel preferon më shumë “Smiley-in”

Angela Merkel preferon më shumë “Smiley-in”

17 August 2017 22:03

Fushatë zgjedhore do të thotë te jesh gjithmonë në kontakt me votuesit, ku bëjnë pjesë edhe të rinjtë. Angela Merkel është e vetëdijshme për fuqinë e mediave sociale. Tani ajo iu përgjigj pyetjeve të yjeve në YouTube, bën të ditur DW.

Emra të çuditshëm e gati të pamundur për t'u shqiptuar: "ItsColeslaw", "MrWissen2Go", "AlexiBexi" dhe "Ischtarlsik", por kështu quhen disa nga yjet e YouTube-it gjerman që të mërkuren për një orë kishin mundësi të bisedonin me Angela Merkel në Berlin. E gjitha u organizua nga një kanal televiziv privat. Nëse kancelarja ka mundur të mbajë mend emrat e tyre, nuk dihet.

Por Merkel e di mirë se kanalet e kësaj katërshe së bashku kanë mbi tre milionë të abonuar, dhe vetëm kjo ka rëndësi.

Para dy vitesh Angela Merkel pati një intervistë me yllin e njohur të YouTube "LeFloid", intervistë, e cila u klikua 5.5 milion herë në YouTube.

Ekspertët e komunikimit i kanë siguruar kancelares se kjo pritet pozitivisht nga opinioni. Me këtë ajo mund të arrijë një grup shoqëror, që është vetëm pak ose aspak i interesuar për politikën, dhe suksese të tilla nuk arrihen me postera zgjedhorë apo me tubime nëpër sheshet e qyteteve.

Një nga pyetjet për kancelaren ishte: Cili është Emoji juaj i preferuar? Për një moment Merkel hezitoi, që mos të bëjë ndonjë gabim, pastaj tha: "Mendoj që Smiley". Ndërsa në pyetjen, çfarë motivi do të vendoste në T-shirt? Kancelarja u përgjigj duke thënë që do të merrte një valë, të Detit Baltik, "si atje lart në zonën zgjedhore që përfaqësoj unë". Në fund të gjithë ishin të lumtur.

Përveç kësaj komuniteti i YouTube mësoi nga Merkel se ajo nuk ka frikë nga islamizimi i Gjermanisë dhe se mendon që dega e infermerisë paguhet shumë dobët. Më shumë gjëra të reja nuk u dëgjuan nga kancelarja. Por megjithatë ajo u tregua shumë e guximshme para të rinjve. Katër intervistuesit ishin të ngazëllyer.

Komentet

Shto koment

Të ngjashme