Ndriçimi RGB është në trend dhe ka përparuar shumë gjatë viteve të fundit, ndërsa mund të gjendet në pothuajse çdo gjë që e ka fuqinë përkatëse.
Megjithatë, ka nga ata përdorues që nuk janë adhurues të mëdhenj të ndriçimit shumëngjyrësh dhe e duan një pllakë amë krejtësisht të zezë apo kartelë grafike të zezë, raporton Guru3D.
Pllaka amë e stilizuar, me dizajn në tone të zeza/të errëta dhe pa ngjyra shtesë është pikërisht ajo që po planifikon kompania MSI. Kompania tashmë ka filluar ta paralajmërojë në faqet e rrjeteve sociale pllakën amë MSI MEG X570 Unify, i tërë dizajni i të cilës është në ngjyrë të zezë.
Përveç dizajnit të bukur, pllaka është e pajisur me tre sllote PCI, dy konektorë 8-pinësh dhe një buton onboard për ndezje dhe resetim, shkruan KOHA Ditore. Ofrohet edhe 2.5 Gbps Ethernet dhe AX WIFI6. MSI i ka kushtuar edhe shumë vëmendje ftohjes, ndërkohë që shihet se tre sllotet M2 kanë përçues të nxehtësisë.
Pllaka amë MSI MEG X570 Unify thuhet se do të kushtojë 239 dollar.
