Ndeshja e Ligës së Dytë të Kosovës në futboll, ndërmjet Xërxes dhe Kikës, ende nuk e ka gjetur fundin, ani pse janë bërë gati gjashtë muaj, që kur nisi
Në fakt, përballja e 16 tetorit, ishte ndërprerë në minutën e 29-të për shkak të të reshurave të shiut, për të vazhduar pas tre ditëve aty ku kishte mbetur, me vendim të Komisionit të Garave, dhe në fund, fitore kishte shënuar Xërxa 2:1 në një ndeshje të tensionuar.
Në po të njëjtën ditë, Kika kishte parashtruar ankesë në Komisionin e Shkallës së Dytë, komision që ishte i obliguar që brenda 8 ditëve, të merrte vendim.
Por, një gjë e tillë nuk ka ndodhur dhe vendimi për përsëritjen e ndeshjes nga minuta e parë, ka ardhur pas një muaji e gjashtë ditëve, duke u shkelur kështu neni 73 i Rregullores së Garave.
Vendimin e këtij komisioni, pavarësisht shkeljeve, e kishte përkrahur edhe Komiteti Ekzekutiv i FFK-së, në mbledhjen e mbajtur në Shkodër me 23 mars 2017.
Edhe
Fushë Kosova dënohet me -9 pikë dhe bie automatikisht në Ligën e Dytë
Me shkeljet e Rregullores së Garave, nuk pajtohet kryetari i klubit të Xërxës, Burim Krasniqi, i cili ka bërë kërkesë në Komitetin Ekzekutiv të FFK-së, për mbrojtjen e ligjshmërisë.
Në një prononcim për Sportin në KTV, Krasniqi, tregon në detaje se çka po kërkojnë nga FFK-ja.
Ai thotë se nuk kanë asgjë kundër Kikës, por dëshirojnë që rregulloret të mos shkelen, madje thotë se janë dëmtuar edhe financiarisht, pasi është dashur t’i paguajnë dy herë zyrtarët e ndeshjeve.
Krasniqi, ka thënë në fund se nëse nuk respektohen aktet normative, atëherë do të bëjnë ankesë edhe në Gjykatën e Arbitrazhit Sportiv.
Kohavisioni ka provuar tw marrw njw prononcim rreth rastit edhe në Federatën e futbollit të Kosovës, por kryetari i Komisionit të Garave për Ligën e Dytë, Ismajl Ajeti, nuk ka pranuar flasë para kamerës, me arsyen se nuk ka të drejtë.
Por, ai është i bindur se ndeshja do të përsëritet nga minuta e parë brenda dy javësh.
Duhet theksuar se janë bërë 173 ditë, që kur kishte nisur përballja ndërmjet dy ekipeve të Ligës së Dytë dhe 3 pikë ende nuk dihet se kujt do t’i takojnë.
Edhe
Feronikeli 74 tërhiqet sërish, por tani nga vendimi për largim nga garat
Ndryshe, Xërxa dhe Kika, bëjnë pjesë në Grupin B të Ligës së Dytë të Kosovës në futboll.
Pas 17 xhirove të luajtura, Kika renditet në vendin e pestë me 37 pikë, kurse Xërxa është e gjashta me 8 pikë më pak.
