Stadiumi kombëtar pritet të kushtojë 65 milionë euro

Stadiumi kombëtar i paraparë të ndërtohet në Sankoc të Drenasit pritet të kushtojë 65 milionë euro. Kështu ka thënë të hënën ministri i Kulturës, Rinisë dhe Sportit, Kujtim Gashi, në takimin e Këshillit Kombëtar për Investime. Ai ka thënë se ndërtimi i këtij stadiumi do ta përmirësojë dukshëm gjendjen e përgjithshme të futbollit.

“Ky është një projekt me rëndësi për zhvillimin e sportit në Kosovë, marrë parasysh anëtarësimin e Kosovës në FIFA dhe UEFA tashmë dhe njëherazi plotësimin e standardeve dhe kritereve të parapara në organizatat ndërkombëtare të sportit. Gjithashtu, do të kontribuonte kësisoj dhe në promovimin e shtetit dhe talenteve të rinj në arenën ndërkombëtare me pjesëmarrje në garat evropiane dhe botërore”, ka thënë ministri Gashi, njoftoi MKRS-ja, shkruan sot “Koha Ditore”.

Ministri Gashi po të hënën për gazetën ka thënë se MKRS-ja është në pritje të ofertës për të vazhduar negociatat me Qeverinë e Hungarisë. “Në javët që vijnë pritet ta kemi ofertën dhe të vazhdojmë negociatat”, ka thënë Gashi.