Sahiti: Ishte e pamundur të zëvendësoheshin Kololli e Zhegrova

Drejtori i Përfaqësueses së Kosovës, Muharrem Sahiti, ka thënë se Benjamin Kololli dhe Edon Zhegrova kanë munguar ndaj Greqisë shkaku i lëndimeve.

Sahiti ka thënë të hënën se ishte e pamundur të zëvendësoheshin Kololli dhe Zhegrova, meqë, sipas tij, lojtarët janë në pushime.

“Benjamin Kololli ka pasur një lëndim. Kur hyri në ndeshjen ndaj Greqisë në Prishtinë pësoi lëndim dhe nuk u aftësua më. Trajneri e liroi për shkak se nuk llogariti në të. Edhe Zhegrova në stërvitje ka pasur një tërheqje muskulore dhe ishte e pamundur të bënim intervenime. Kishim shumë mungesa kundër grekëve. Ky fat i keq ndaj tyre na ka përcjellë gjithmonë. Sa herë që jemi ballafaquar ndaj tyre, kemi pasur mungesa të shumta. Nuk ka qenë e mundur të zëvendësohen, pasi skuadrat kanë përfunduar kampionatet dhe lojtarët janë në pushime. Qershori është muaji më i keq për ndeshje, pasi futbollistët janë në pushime. Edhe klubet e Superligës kanë qenë me pushime dhe nuk kemi mundur të bëjmë intervenime”, ka thënë Sahiti të hënën për KOHËN.

Kololli ndaj Greqisë në ndeshjen e parë të luajtur në Prishtinë luajti në 33 minutat e fundit, ndërsa ndaj Irlandës së Veriut ishte në stol.

Zhegrova u paraqit gjatë 90 minutave ndaj Greqisë në Prishtinë, ndërsa nuk ishte fare pjesë e ekipit të “Dardanëve” në dy ndeshjet e fundit, atë kundër Irlandës së Veriut dhe të dielën ndaj Greqisë në Volos.

Kosova e mposhti Irlandën e Veriut 3:2, kurse pësoi nga Greqia 2:0.