Gerard Pique kërkoi ndihmë nga presidenti i Federatës spanjolle të futbollit për të luajtur në Lojërat Olimpike të Tokios, zbuloi të mërkurën audioincizimi i vjedhur nga Federata. Detajet, të publikuara nga gazeta “El Confidencial”, erdhën pasi një audio tjetër kishte zbuluar se mbrojtësi i Barcelonës ndihmoi për të negociuar një komision prej 24 milionë eurosh për të çuar Superkupën e Spanjës të Federatës në Arabinë Saudite. Pique mund të dëgjohet duke i kërkuar presidentit të federatës, Luis Rubiales, të bisedojë me trajnerin e ekipit olimpik, Luis de la Fuente dhe të krijojë një takim mes tyre.
“Duhet ta bësh këtë për mua Rubi, duhet ta bësh atë të ndodhë”, tha Pique. “Duhet ta mbajmë sekret dhe të flasim me trajnerin. Unë do të shkoj në Madrid dhe do të ulemi me të. Ne duhet ta bëjmë atë në një mënyrë që të mos jetë askund. Ne të tre duhet ta mbajmë këtë sekret deri në fund, a nuk mendon?”.
Rubiales pranoi të fliste me trajnerin, por tha se do të varet nga De la Fuente të vendosë se çfarë të bëjë.
“Po, duhet ta mbajmë sekret, dhe nëse trajneri dëshiron ta bëjë këtë, le të vazhdojmë me të, do të isha i emocionuar”, tha Rubiales.
Pique tha se ai nuk donte që informacioni i rrjedhur të pengonte lojtarët e tjerë të përpiqeshin të kërkonin të njëjtën gjë. Ai tha se kishte dëgjuar se Sergio Ramos gjithashtu donte të luante dhe me gjasë e zbuloi atë në media për t'i bërë presion trajnerit. Presidenti përfundimisht foli me De la Fuenten dhe tha se trajneri kërkoi të priste derisa përfaqësuesja të kishte siguruar kualifikimin për turneun olimpik.
“Ai tha se pasi skuadra të kualifikohet do të flasë me ty”, tha Rubiales. “Nuk dua të bëj presion ndaj tij. Ai tha se do të donte të fliste me ty, por pasi skuadra të kualifikohej”.
Rubiales foli publikisht për herë të parë në një konferencë shtypi të mërkurën për këtë çështje dhe tha se Pique nuk ishte lojtari i vetëm që foli me të për të shkuar në Lojërat Olimpike.
“Kam biseduar me De la Fuente për të dhe për lojtarë të tjerë gjithashtu”, tha Rubiales. “I thashë se disa më thirrën dhe se ai duhej të merrte vendimin e tij. Pique nuk ishte lojtari i vetëm që më thirri”.
As Pique dhe as Ramos nuk arritën në skuadrën olimpike, e cila përfundoi me medaljen e argjendtë pas humbjes nga Brazili në finale. Lojtarët mbi 23 vjeç të thirrur në skuadër ishin Mikel Merino, Marco Asensio dhe Dani Ceballos. Publikimi i audioincizimit këtë javë erdhi pasi federata tha se ishte në shënjestër të hakerëve, të cilët vodhën gjithashtu emaila, mesazhe me tekst dhe dokumente që përfshinin zyrtarët e saj të lartë. Informacioni u lëshua më pas në gazetën “El Confidencial”. Në disa nga audiot, Pique i tha Rubialesit se duhej të përfshinin ish-mbretin Juan Carlos në përpjekje për të ndihmuar në negocimin e marrëveshjes së Superkupës me Arabinë Saudite. Pique u mbrojt pasi u zbulua se ai ndihmoi në marrjen e turneut në Arabinë Saudite si pjesë e një marrëveshjeje me vlerë 40 milionë euro. Grupi “Kosmos” i Piques do të paguhej katër milionë euro për turne nga organizatorët sauditë për negocimin e marrëveshjes gjashtëvjeçare në atë kohë. Pique tha se paratë do të ndahen mes klubeve dhe Federata do të mbajë rreth gjashtë milionë euro. Ai tha se kurrë nuk ka marrë asgjë nga Federata spanjolle. Mbrojtësi 35-vjeçar tha se nuk kishte asgjë për të fshehur dhe ishte krenar që kishte arritur marrëveshjen e Superkupës. Ai tha se e di se si “të ndajë një marrëveshje komerciale nga puna ime si lojtar” dhe se “një konflikt interesi do të varet nga vlerat e secilit person”.
Rubiales haptazi e mbrojti Piquen, duke thënë se nuk kishte asgjë të paligjshme në atë që u bë.
“Do të doja të kishte më shumë lojtarë si Pique, të cilët janë të aftë të bëjnë gjëra të tjera”, tha Rubiales.
Rubiales dhe Piqué gjithashtu mohuan se kanë bërë diçka të paligjshme në marrëveshjet me klubin në pronësi të Piques, Andorra dhe hodhën poshtë kritikat se Real Madridi dhe Barcelona po favorizoheshin duke marrë më shumë para se klubet e tjera në marrëveshjen e Superkupës. Rubiales tha se ai i kuptonte kritikat nga njerëzit si trajneri i Atletico Madridit, Diego Simeone, dhe tha se ishte i hapur të fliste me të dhe të shpjegonte gjithçka. Rubiales u mërzit që pak njerëz po flisnin për sulmin e hakerëve ndaj federatës.
“Kam frikë”, tha Rubiales, “se po këta njerëz që morën dokumentet mund të vijnë dhe të vendosin një qese kokainë në bagazhin e makinës sime”.