Ardon Jashari këtë muaj ka marrë ftesë nga ekipi U21 dhe jo nga ekipi A i Zvicrës. Në prag të Kampionatit Evropian për grupmoshën U21, Jashari thotë se kjo ftesë mund të jetë gjëja më e mirë e mundshme për të. Vitin e kaluar Ardon Jashari është rritur shumë, shkruan “Blick” të hënën.
“Kam përjetuar shumë”, thotë ai.
Në janar të vitit të shkuar ai ishte startues në Superligën zvicerane për herë të parë te skuadra e Luzernit. Disa muaj më vonë ai u zgjodh kapiten. Dhe së fundmi, në nëntor, Jashari u përfshi në skuadrën e selektorit Murat Yakim për kampionatin botëror “Katari 2022”.
“Ishte një ëndërr që u bë realitet”, thekson 20-vjeçari. Tashmë Jashari duhet të kënaqet me Përfaqësuesen U21 në rrugën e tij drejt ngjitjes. Ai luajti në humbjen 3:2 nga Spanja në ndeshjen miqësore të zhvilluar në Almeria ditë më parë. “Kjo nuk është ulje apo nënvlerësim për mua”, sqaron ai ftesën nga ekipi U21.
Madje, Jashari zbulon se e mori këtë vendim në konsultim me selektorin Yakin, i cili e ka këshilluar që t’i bashkohet Përfaqësueses U21 në përgatitje për Kampionatin Evropian që mbahet këtë verë.
“Në lidhje me Kampionatin Evropian të verës, ai më tha se do të ishte mirë që të shkoja në U21 dhe të njihja më mirë stafin dhe lojtarët”, shpjegon Jashari.
Në fakt, Jashari e njeh ekipin e trajnerit Patrick Frame në një masë të kufizuar. Ai është thirrur vetëm një herë për U21 – në mars të vitit të shkuar. Dhe ai kurrë nuk u konsiderua për përzgjedhje në ekipet më të reja të Zvicrës. Megjithatë, Jashari ka një vizion të qartë se si dëshiron ta ndihmojë ekipin U21 për t'u bërë gati sa më mirë për Evropianin që nis në fillim të muajit qershor.
“Dua të shkoj përpara dhe të marr përgjegjësi, siç bëj te Luzerni”, insiston Jashari. Të martën Zvicra U21 do të përballet me Izraelin në ndeshjen miqësore që do të luhet në Basel. Pas humbjes së ngushtë ndaj Spanjës, tani Zvicrës i duhet fitorja, insiston Jashari.
“Kur veprojmë si ekip, nuk kemi pse të fshihemi nga askush. Pra, duam fitore ndaj Izraelit”, thotë Jashari.
Sipas tij, vetëm me këtë qëndrim Zvicra U21 mund t’i mbijetojë në verë grupit të Evropianit, të cilin e përbëjnë edhe Italia, Franca e Norvegjia. Ndërsa qëndrimi i Jasharit po i pëlqen edhe trajnerit.
“Duhet të jemi jashtëzakonisht të fortë si ekip”, insistoi Frame. Jashari ka dy paraqitje me ekipin A të Zvicrës, ndërsa si lojtar është zhvilluar te Luzerni. Këtë sezon ai ka 1 gol e 4 asistime në 27 paraqitje për Luzernin. 20-vjeçari ka kontratë deri në vitin 2026 me Luzernin, ndërsa tashmë ka tërhequr vëmendjen e disa skuadrave të njohura të Evropës.
