Musiala shkon në Katar në top-formë

Njëri nga lojtarët më të mirë të Përfaqësueses së Gjermanisë në Kupën e Botës në Katar, mund të kishte qenë lehtësisht në skuadrën e Anglisë. Mesfushori me tipare sulmuese i Bayern Munichut, Jamal Musiala, përfaqësoi Anglinë në nivelin e të rinjve përpara se të zgjidhte përfundimisht Gjermaninë vitin e kaluar, pasi u bind nga trajneri i atëhershëm Joachim Loew.

Musiala konfirmoi vendin e tij te Gjermania në Kupën e Botës me një paraqitje vendimtare në fitoren 2:0 të Bayernit ndaj Schalkes të shtunën. Duke bërë paraqitjen e 100-të për klubin në moshën 19-vjeçare, Musiala asistoi për të dy golat, njëri prej të cilëve ishte me një pasim me takë për Serge Gnabryn. Shkathtësia individuale u shfaq kur ai dribloi përtej dy mbrojtësve dhe kaloi portierin, ndonëse goli u anulua për pozicion jashtë loje. Mes admiruesve të Musialas është edhe kapiteni fitues i Kupës së Botës në vitin 1990, Lothar Matthaeus, i cili i kërkoi Bayernit ta vendoste të riun në zemër të ekipit për vitet në vijim, siç bëri Barcelona me Lionel Messin për më shumë se një dekadë.

Trajneri i Bayernit, Julian Nagelsmann, vlerësoi “këmbët e shpejta dhe të gjalla” të Musialas dhe sugjeroi që puna e tij e shpejtë me këmbë ndonjëherë e bënte punën e vështirë të dukej e lehtë, me lojtarin që gjithmonë dukej se ishte i pari që kthehej prapa për ta ndihmuar ekipin. Musiala e lë lojën e tij të flasë dhe në përgjithësi është i sjellshëm dhe modest në intervista.

“Ishte e rëndësishme që ne morëm tri pikë për të shkuar me një ndjenjë të mirë në pushimin e Kupës së Botës”, ishte këndvështrimi i Musialas për shfaqjen e tij fituese kundër Schalkes. “Mendoj se për gjysmën e parë të sezonit kemi bërë mirë. Kemi pasur faza të këqija, por mendoj se është mirë ta mbyllim sezonin fuqishëm”.

I lindur në Gjermaninë jugperëndimore nga babai nigerian dhe nëna gjermane, Musiala kaloi pothuajse një dekadë të fëmijërisë në Angli. Ai ishte lojtar i ri fillimisht për Southamptonin, pastaj Chelsean, derisa nënshkroi për Bayernin në vitin 2019 në moshën 16-vjeçare. Kur pandemia e koronavirusit zgjati sezonin në qershor të vitit 2020, ai bëri debutimin për t'u bërë lojtari më i ri i Bayernit në Bundesligë ndonjëherë. Tre muaj pas kësaj ai ishte golashënuesi më i ri i klubit në kampionat. Trajneri që i dha Musialas shansin në ekipin e parë në atë kohë, Hansi Flick, tani është trajner te Përfaqësuesja e Gjermanisë. Pasi Loew e bindi adoleshentin të luante për Gjermaninë dhe i dha atij debutimin ndërkombëtar, Flick e bëri Musialan titullar të rregullt në ekip, duke luajtur në tetë ndeshjet e fundit që ishin miqësore dhe në kuadër të Ligës së Kombeve.

Një veçori e karrierës ndërkombëtare në lulëzim të Musialas është se nga 17 ndeshjet për Gjermaninë, tri janë luajtur kundër Anglisë – ekipi për të cilin ai mund të kishte luajtur në vend të Gjermanisë. Përfaqësuesja e Gjermanisë ndeshjen e parë në botërorin “Katari 2022” e luan më 23 nëntor kundër Japonisë. Ndërsa në kuadër të Grupit E do të përballet edhe me Spanjën dhe Kostarikën.