Portieri i Kosovës, Arijanet Muriq, ka thënë se përballja me Çekinë, ishte ndeshja më e vështirë për Kosovën deri tash në eliminatoret për “Euro 2020”.
Humbja 2 me 1 ia shoi shpresat Kosovës për kualifikim direkt me shpresën që mbetet te play-offi i Ligës së Kombeve që do të zhvillohet në muajin mars.
“Kemi pasur presion, donim të fitonim me çdo kusht. Ishte ndeshja më e vështirë deri tash. Jemi krenarë për tifozët tanë që erdhën nga e gjithë bota për të na përkrahur. Thjesht duhet t’i falënderojmë të gjithë”, ka thënë ai teksa ka shtuar se për ndeshjen e së dielës ndaj Anglisë në Prishtinë pret ndeshje të mirë të Kosovës para tifozëve të vet.
