Liverpooli do të mundohet t’i mbajë gjallë shpresat për ta mbyllur këtë edicion me katër trofe të fituar.
Të shtunën në orën 17:45, Liverpooli takohet me Chelsean në finalen e Kupës FA.
Skuadra e Juergen Kloppit i ka edhe katër ndeshje në tentimin historik për t’u bërë ekipi i parë anglez që i fiton të gjithë katër trofetë brenda një sezoni.
E mposhti Chelsean në Kupën e Ligës në muajin shkurt dhe arriti në finale të Kupës FA dhe Ligës së Kampionëve, ku do të takohen me Real Madridin më 28 maj.
Asnjë skuadër tjetër angleze nuk i është afruar kaq shumë një suksesi të tillë, por Liverpooli e di po ashtu se gjasat për ta fituar Premier Leaguen kanë nisur të zbehen.
Edhe
Në Angli luhen edhe dy gjysmëfinalet e Kupës FA
Manchester City ka tri pikë më shumë se vendi i dytë, Liverpooli, pasi fitoi 5:1 kundër Wolverhamptonit të mërkurën. I duhen edhe katër pikë nga dy ndeshjet e fundit, kundër West Hamit dhe Aston Villas, për ta mbrojtur titullin.
Finalja e Kupës së Ligës mes Liverpoolit e Chelseat ishte dramatike në shkurt. Pa gola përfunduan koha e rregullt dhe vazhdimet, ndërsa “të kuqtë” e Kloppit triumfuan 11:10 në ekzekutimin e penalltive.
Liverpooli dhe Chelsea janë skuadrat e para angleze që takohen në finale të dy kupave vendore në vitin e njëjtë, qëkur Arsenali dhe Sheffield Wednesday e bënë një gjë të tillë në vitin 1993.
Skuadra e Kloppit do të mundohet ta përsërisë suksesin e “revolveristëve”.
Por, në takimin e 60-të të sezonit, lodhja mund të luajë rol te skuadra e Liverpoolit, që shpreson ta fitojë Kupën FA për herën e parë që prej vitit 2006.
Edhe
Në Angli luhen ndeshjet çerekfinale të Kupës FA
Për ta mbajtur të freskët skuadrën, Kloppi bëri disa ndryshime të martën në fitoren ndaj Aston Villas, por e ka humbur mesfushorin brazilian, Fabinho, i cili shkaku i lëndimit nuk do të luajë në finale.
Ashtu si Liverpooli, sezoni i Chelseat do të mbyllet me 63 ndeshje të luajtura, dhe lodhja veçse ka nisur të dalë në pah.
Para fitores 3:0 kundër Leedsit, Chelsea kishte vetëm një fitore në pesë ndeshje të ligës dhe e kishte të vështirë të këndellej pas eliminimit nga Liga e Kampionëve në çerekfinale nga Real Madridi.
Chelsea ka nisur të mendojë për sezonin e ardhshëm me pronarin e ri Todd Boehly, që e bleu skuadrën për 4.25 miliardë funte.
Edhe
Chelsea – Liverpool, kryendeshja e xhiros në Angli
Trajneri Thomas Tuchel do të mundohet që ta mbyllë periudhën e Roman Abramoviqit me një trofe të fundit.
Tuchelit mund të mos i luajë kroati Mateo Kovaçiq, pasi mesfushori mori lëndim kundër Leedsit.
