-
Nga:
Arsim Maxhera
- 4 maj 2023 22:01
- Shpërndaje në:
Si kampione olimpike, Distria Krasniqi e Nora Gjakova janë pretenduese për medalje në Kampionatin Botëror të Xhudos, që të dielën fillon në Doha të Katarit. Ndërkohë Laura Fazliu, me gjithë ngritjen e hovshme në vitet e fundit, nuk llogaritet në mesin e favoriteve.
Laura do të garojë në kategorinë deri 63 kilogramë, në ditën e katërt të Botërorit, përkatësisht të mërkurën e ardhshme. 22-vjeçarja nuk është bartëse dhe rrjedhimisht nuk llogaritet një nga favoritet. Laura është e 11-ta në ranglistën botërore dhe është edhe e 11-ta prej xhudisteve të ranguara në Botëror, në kategorinë e saj. Të gjitha xhudistet e ranguara në dhjetë pozitat e para në 63 kg janë pjesë e Botërorit. Kjo dëshmon se konkurrenca do të jetë e jashtëzakonshme.
Pos ranglistës, në favor të Laurës nuk shkon as përvoja në Botëror. Ajo për herë të tretë paraqitet në Kampionatin Botëror për seniorë. Në dy pjesëmarrjet e para ishte eliminuar në luftërat e para.
Laura Fazliu, megjithatë, është kandidate për medalje botërore. Forma e shfaqur së fundit dhe ngritja e madhe i japin gjasa asaj. Më 24 mars, në Grand Slamin në Tbilisi, Laura ishte e dyta. Më 16 shkurt, në Grand Slamin në Tel-Aviv, u rendit e treta. Në dhjetor ishte e dyta në Mastersin në Jerusalem. Mastersi mbledh vetëm xhudistët më të mirë nëpër kategori. Vjet Laura ishte, po ashtu, e para në Evropianin U23, e para në Lojërat Mesdhetare dhe e dyta në Evropianin për seniore.
Gjithë këto rezultate nuk janë të rastësishme. Janë rezultat i nivelit që tashmë e ka Laura, falë punës me trajnerin Driton Kuka.
Në Tel-Aviv, Laura e ka mposhtur legjendën botërore, francezen Clarisse Agbegnenou. Ajo, po ashtu, nuk është në mesin e bartëseve në Botëror, por është prej favoriteve të mëdha për medalje.
Laura në dy vjetët e fundit ka mposhtur të tjera xhudiste të mëdha. Dhe shikon para me optimizëm drejt Botërorit në Katar.
“Xhudistja e fundit që mposhti superyllin francez ishte ‘motori’ i Kosovës, Laura Fazliu, që renditet e 11-ta. Si gjithnjë, ajo do të kërkojë të fitojë medalje për përfaqësuesen e saj të ranguar lart”, ka shkruar Unioni Evropian i Xhudos.
Ka plot xhudistë nëpër kategori që nuk janë bartës e që mund të futen në garë për medalje. Akil Gjakova është në këtë listë. Akili është i 39-ti më i ranguari në kategorinë deri 73 kg. Akili ka munguar gjatë nga garat dhe për këtë ka rënë në ranglistën botërore. Po bën përpjekje për t’u kthyer në Top-10.
“Akil Gjakova mungon në Top-8. Ndonëse Akili ka qenë në kërkim të formës së fundit, skuadra (e Kosovës v.j.) di si të arrijë kulmin në momentin e duhur”, ka shkruar Unioni Evropian.
Bartëse nuk është as Loriana Kuka. Ajo është e 16-ta e ranguar në kategorinë deri 78 kilogramë. Loriana, po ashtu, ka pasur telashe me lëndime dhe rënie të formës së fundi. Por po punon për kthim në majë. 26-vjeçarja tashmë ka medalje në Kampionat Botëror. Në vitin 2019 fitoi medaljen e bronztë.
“Një tjetër as i Kosovës, Loriana Kuka, që tashmë është medaliste botërore, shtohet në listën e xhudistëve të fortë që nuk janë bartës”, ka shkruar EJU.
Erza Muminoviq në kategorinë deri 52 kilogramë dhe Flaka Loxha në kategorinë deri 57 kilogramë do të mundohen të shkojnë sa më larg që është e mundur. Në kategorinë deri 52 kg garon Distria Krasniqi, ndërsa në atë deri 57 kg, Nora Gjakova.
Botërori në Doha vlerësohet jashtëzakonisht i fortë, por gjithsesi Kosova ka adutët e saj për medalje.
