Kryeministri i Kosovës, Albin Kurti e ka pritur në takim të dielën sulmuesin e Kosovës, Albion Rrahmanin.
Ai ka folur fjalë të mëdha për sulmuesin e Rapid Bukureshtit.
“Sot u takuam me të dhe babin e tij, Driton Rrahmani, njëherësh ikonën e futbollit të Kosovës gjatë viteve të 90-ta, i cili me shumë pasion po vazhdon ta mbështesë të birin në karrierën e tij në futboll. Me talentin e trashëguar nga familja dhe me punën e tij të pandalshme, Albioni në Superligën rumune sivjet ka shënuar 14 gola në vetëm 16 ndeshje të zhvilluara, duke ecur me hapa të sigurt për t’u bërë golashënuesi më i mirë i kampionatit. Albionit i urova shumë suksese tutje, në veçanti në ndeshjet që do t’i zhvillojë me fanellën e Kosovës”, shkruan ndër të tjera Kurti të dielën. Rrahmani është pjesë e grumbullit të Kosovës për ndeshjet miqësore të këtij muaji.
Më 22 mars, Kosova luan në Yerevan ndaj Armenisë, kurse pas tri ditësh kundër Hungarisë në Budapest.
Rrahmani për Kosovën ka luajtur dy ndeshje, ndërsa është duke shkëlqyer në kampionatin elitar të Rumanisë. Ka shënuar 13 gola në 15 ndeshje me fanellën e Rapidit. Rapidit iu bashkua në gusht të vitit të kaluar nga Ballkani për 600 mijë euro. Tani po kërkohet edhe nga Aston Villa i Premier Leagues së Anglisë.
