Kapitenia e Kosovës në futboll, Edona Kryeziu ka thënë se u ka munguar fati përballë Polonisë, ndërsa ka theksuar se kanë mundur ta fitojnë ndeshjen.
Por, Kosova ka humbur ndeshjen me rezultatin 2:1 të enjten në stadiumin “Fadil Vokrri” në Prishtinë.
“Loja e futbollit i ka edhe rëniet edhe ngritjet, por duhet të ngrihesh dhe të luftosh për fanellën. Përgëzoj lojtaret për angazhimin, pasi luftuam, por nganjëherë nuk ec. Fati nuk ishte në anën tonë, mund edhe të fitonim apo edhe të barazonim, por nuk na eci fati. Polonia është e fortë fizikisht, por edhe ne u angazhuam maksimalisht për të fituar, por edhe përvoja e bëri të veten që nuk erdhëm deri te fitorja”, ka thënë Kryeziu pas ndeshjes.
