Në një garë që zgjati afro një orë, notari kosovar Arti Krasniqi mbeti 22 sekonda larg medaljes. Krasniqi 20-vjeçar të enjten ka zhvilluar garën e tij të parë për Kosovën. Ai javën e kaluar la Gjermaninë për të garuar për Kosovën. Dhe fillimi i karrierës ndërkombëtare, si garues i Kosovës, është vlerësuar i shkëlqyeshëm.
Arti Krasniqi garoi në not 5 kilometra në ujëra të hapura, në Lojërat Mesdhetare në Rërë, që po mbahen në Patras të Greqisë. Në këtë distancë, Arti më herët, këtë verë, kishte dalë nënkampion i Gjermanisë, kurse në 10 kilometra ishte kampion i Gjermanisë. Në garën e parë ndërkombëtare për Kosovën nuk fitoi medalje, por ishte pranë saj, shkruan sot Koha Ditore.
Andrea Manzi i Italisë fitoi medaljen e artë në 5 kilometra not në ujëra të hapura, duke regjistruar kohë prej 57:57.02 minutash. Fare pranë tij ishte italiani tjetër, Marcello Guidi, që kishte kohë 57:57.08 minuta. Greku Georgios Arnaikos fitoi medaljen e bronztë me kohë 59:27.02 minuta, ndërsa Arti ishte menjëherë pas tij me kohë prej 59:49.01 minutash. Të tjerët garues në finish arritën pas më shumë se një ore notim. Gjithsej garën e përfunduan 14 notarë, ndërsa dy nuk arritën në cak. Pos nga Italia e Greqia, kishte notarë edhe nga Portugalia, Maroku, Kroacia, Tunizia, Qiproja, Libia e Siria.
(Artikullin e plotë mund ta lexoni në numrin e sotëm të Kohës Ditore)
