Skuadra e Juventusit ka vazhduar me formën e mirë në kampionatin e Italisë. Juventusi ka regjistruar edhe fitoren e dhjetë këtë edicion, pasi triumfoi në udhëtim te skuadra e Monzas. Dueli i zhvilluar të premten mbrëma në kuadër të xhiros së 14-të në Serie A, përfundoi me shifrat 2:1 në favor të Juventusit.
Mesfushori Adrien Rabiot shënoi golin e parë të ndeshjes. Rabiot realizoi me kokë në minutën e 12-të, një minutë pasi Dushan Vllahoviqi e humbi penalltinë për Juventusin.
Monza barazoi shifrat në 1:1 në minutën e parë të kohës shtesë me anë të Andrea Carbonit.
Por, pak minuta më vonë, në minutën e katërt të kohës shtesë, mbrojtësi Federico Gatti ia siguroi Juventusit fitoren e rëndësishme.
Me këtë fitore, Juventusi ngrihet përkohësisht në pozitën e parë në tabelë. Ka tubuar 33 pikë, një më shumë se Interi që ka një ndeshje më pak të luajtur.